“بايسكشوال دراما”

بالوحي من مقالات “ليزبيان دراما” (1-2-3) بقلم حبّي الأوحد غير المشروط، “عشتار“، بحب قدملكن أفكاري بحسب تجربتي عن ال”بايسكشوال دراما”.

بإحدى الجلسات مع معالجي النفسي (judge me, I have issue) اكتشفت إنو أكتر البنات يللي ضهرت معهن وتحديداً العلاقات ذوات المدى الطويل كانوا مع بنات بايسكشوال، أو بنات ثنائيات الجنس.
هلق الفكرة إنو مش غلط أبداً الليزبيان أو المرأة الكويرية تضهر مع بنت بايسكشوال، بالعكس، الأمر فيو كتير تحديات وبحسب اكتشافي العظيم، بهيدا التحدي بيكمن سرّ البلاء. شو هيّ المشاكل يللي ممكن تواجهنا إذا ضهرنا مع بنت بايسكشوال؟ رح إسرد كم وحدة منها:

 1- دراما “صاحبي شو بعمل فيه؟”
يا إختي بنت مصاحبة شبّ واكتشفت نفسها، بفضل الجغلنة اللي شديناها فيها، تعمل بي ايييه؟؟؟
إنو هوي الأمر شوي معقد وكتير بسيط. المشاعر والفيزيولوجية بين شب وبنت كتير مختلفين. يعني انت شوفي طعمة تمّك، اللي تذوقت الشعورين، يللي بتناسبك أكتر ودعسي وما يهمّك (بترجع بخصوص بتلمّك).

2- دراما “مش عاملة سكس مع بنت من قبل”
ما في مشكل! نحنا صدرنا واسع ورحب! يعني إذا إلكن جلادة تستثمرو بشوية أحاديث جنسية وعندكن الوقت لتخلوها ترتاح مع جسمكن وعلاقة جسمها بجسمكن تعاطياً مع العواطف الجديدة يللي بلّشت تنبّت، يمكن تكونو قطفتو. وأنا ببصم بالعشرة إنو في ناس بس بدّها دفشة زغيرة لتقلع ويا مين يلحق!

3- دراما “ما فيّي آخدك عا بيت أهلي”
سوري بس منظرنا مش منظر لبعض الناس اللي مش معودين على الشكل البديل أو ال alternative style. يعني مثلاً الشعر القصير، المحلوق على الواحد من ميل وحدة، ال piercing، أو البوط يللي ما بتشلحوا بعزّ الصيف… حدا عم يتخايل ردة فعل الأهل على كل هول مجموعين سوا؟ وحتى لو كان شكلكن “كلاسيكي” شوي، الإمّ دايماً بتعرف! فا بتقضّو وقتكن بالبيت تبعكن إذا بتقدرو أو ببعض البارات يللي ما بترميكن برّا إذا مسكتو إيدين بعض.

4- دراما “اشتقت للعضو الذكري” (أو أيّا مصطلح تاني ممكن تستعمله)
إنو البنت كل عمرها معوّدة عا شي معيّن، ومبسوطة بالأدوات الجديدة  اللي أخدت شهادة بإدارتها، بس في شي ناقص، حرفيّاً! ما فينا نلومها أكيد وهيدا موضوع يمكن ينحلّ بالألعاب الجنسية، أو السكس تويز، بس كمان ممكن وحدة تجي تقلكن “إنو منّو نفس الإحساس”! يا وقعة السحاقية! بهيك حال كل وحدة فيكن هي ونصيبها! ما فينا نعرف البطيخة كيف بتكون قبل ما نشتريها! عجبها الموضوع عجبها، ما عجبها الباب بفوّت [عضو ذكري] جمل.

5- دراما “بدّي إتجوّز بعدين” (مش بيّنت هينة هلّق دراما العضو الذكري؟)
نحنا عايشين بلبنان وهوّي منّو أمر مستحيل، بس إذا شدّينا الهمّة ممكن نعيش مع صاحبتنا حياة مشتركة بهيدا البلد، بس إنسو موضوع الزواج. نصيحة: إذا هيّ مصرّة تتزوج “رجّال” وتعيش بلبنان وتجيب ولاد، من أوّل الطريق، هريبة يا أوادم!

هيدي بعض الأمثال عن الدراما اللي ممكن نصطدم فيا بعلاقاتنا مع النساء الثنائيات الجنس.

في عالم وقتها تعرف عن بنت إنها بايسكشوال:
- بتركض بالإتجاه المعاكس (هون منشوف آثار الخبرة المكتسبة عبر المواعدة).
- بتقول “إنو إي، عادي، بايسكشوال” (إنعدام الخبرة).

أما في بعض الأشخاص، متلي، يللي بتجمع بين هالمجموعتين، وبكون عندها خبرة، وبتقول “إنو إي، عادي، بايسكشوال”، وبكون عنها ميول لوجع الراس وهواية الفوتة بالحيطان واحد تلو الآخر، وبتتخايل إنو عندها مناعة لوجع القلب.

حذّرني المعالج النفسي تبعي من النمط يللي دايماً بوقع فيه، وحلّفني ومضّاني على ورقة وعدتو فيها ما إضهر مع بنت بايسكشوال، بس بيناتنا، حلو التحدّي! وبعرف حالي مستعدّة بأية لحظة إلحس المضية تبعي وارمي حالي على أوّل قمّورة بايسكشوال بلتقي فيها! في أجواء تعطّش لامتناهي للدراما، وإذا ما جرّبتيها، ما أدراكِ ما “البايسكشوال دراما”؟