!جنى

1 Star2 Stars3 Stars4 Stars5 Stars (4 votes, average: 5.00 out of 5)
Loading ... Loading ...

892 views

جنى وما ادراك ما جنى…

جنى مش متل أي شخص بيمرق بحياتك، ما فيك ما تلاحظ إنها مختلفة، ما فينا ما نلاحظ حركتها، مشيتها، طريقة حكيها، كل شي فيها غير، مش متل أي بنت عمرها 11 سنة.

كنت إسمع غرين تحكي كتير عنها، وإبتسم لأن كتير بتذكرني بحالي أنا وعم بكبر، أول مرة التقيت بجنى، كنا عم نحضر لحفلة رأس السنة، وصلت غرين بتوقف سيارتها برا، بطلّع أنا وبشوف في حداً معها بالسيارة.

لوهلة، مرق شريط حياتي قدام عيوني، شفت حالي بعيون جنى، وبالطريقة يلي سلمت فيها عليي، مسكة ايدها، ونبرة صوتها.

مشيّت قدامي وعم تمشي معها ذكريات الطفولة تبعي، كيف كنت إلعب بالفوتبول، وكنت ما البس إلا  تياب للشباب، ويكون شعري قصير، وما إلعب مع البنات لأن ما كنت شوف حالي إلا مع “عصابة الشباب”.

سألت جنى إذا بتلعب معي فوزبل(foozball)  ، نحنا وعم نلعب كنت عم راقب كل حركة وكل خطوة.

يمكن صعب على كتير عالم تفهم عليي، وكتير عالم كمان حتعرف وتفهم عن شو عم بحكي، بس أنا هلأ رح خلي غرين تكتب وتشرحلكن أكتر عن جنى.

جنى حدا كتير مهضوم، صحيح عمرها 11 سنة  بس  كتير أكبر بأفكارها، وبإحساسها، وبحركاتها. علاء الدين شاف حالو فيها هوي وصغير، وأنا بشوف كل شي كان بدي كونو انا وصغيرة فيها.

جنى عم تعبر عن كتير إشياء كان انا عبالي اعملها، وإحكي فيها مع اهلي او أصحابي، بس بوقتها ما كان هلشي متوفر. اليوم انا بجاوب جنى على كل سؤال بتسألوا، لأن عندها كتير تساؤولات عن شخصيتها وعن الحياة بشكل عام. لأن كل ما عم تكبر عم تحس إنو هيي مش بنت، ومن فترة سألتني : غرين بس إكبر فيي إشتغل وجيب مصاري وغير حالي؟ وانا أكيد قلتلها : أيه فيكي أكيد إذا إنت بتحسي بهالشي، وشرحلتها عن المراحل يلي بتمرق فيها إذا بدها تغير،  وخبرتها إنو بالنهاية القرار بيرجعلك كل ما تكبري بتتعرفي على حالك أكتر وبتعرفي شو بدك.

جنى من يومين بتبعتلي رسالة على التلفون عم تخبرني إنو عم تلعب ورق وعم تخسر الشباب، وإنو بالمنطقة عندن بعيطولها “أبو علي” وبالمدرسة ” جو” وهيي عم تحس حالها كتير مبسوطة. حتى لو هيدا مش إسمها الحقيقي.

من خلال جنى او جو صرت عم شوف العالم بطريقة تانية، صحيح هيي صغيرة بس مش غلط أبداً نتعلم إشياء من الصغار، يمكن جنى عم تخليني شوف الإشياء والعالم من حولي حلو اكتر، عم تخليني أصبر وإشتغل وأوصل للمطرح يلي بدي ياه، وبنفس الوقت عزز قدراتي تكون حدها بالوقت المناسب…

وجود جنى أو جو وغيرها وغيرها…. بخالينا نتأمل بمستقبل أفضل لأن بخلينا وبشجعنا نشتغل لنؤمن هيدا المستقبل الأفضل.

Aladdin and Green 

Aladdin

Leave a Reply