أهلك بيعرفوا عنك؟
(3 votes, average: 5.00 out of 5)
Loading ...
أهلك بيعرفوا عنك؟
كل مرة حدا بيسألني أهلك بيعرفو عنك؟ الجواب بكون لأ! مع إنو شوي كتير شكلي بدل إنو أنا لزبيان.
صراحة أنا أكتر من مرة حاولت خبر الماما عني بطريقة غير مباشرة، بس تفتح سيرة الزواج، أو بس تتمنى إنو تشوف شي حفيد قبل ما تموت. هون أنا بصير بحكي عن حالي بوجها وبخبرها إنو لأ يا ماما هالشي ما رح يتحقق لأن أنا ما بحب إتزوج رجال وعيش معو. بس للأسف كل ما ينفتح هالموضوع ماما بكون جوابها: ” بلا هبلك شو هالحكي هيدا…”
أول مرة كنا عم نحكي بالموضوع، كنت عم بتمشى معها حد بيتنا بالجنوب، وهون هيي كانت عم تدعيلي إنو الله يكون معي وإتوفق بجامعتي وشغلي ( يعني من الأخر كانت رضيانة عليي بهيداك النهار)، وأنا بس سمعت سيرة الزواج قلت براسي هيدي هيي لازم خبرها هلق.
أنا كنت كتير واضحة معها وقلتلها يا ماما أنا ما رح كون مع رجال، لأن ما بحب فكرة الزواج من أساسها، وما بحب كون مرتبطة وعندي مسؤوليات تجاه حدا.
بتسألني : طيب ما بدك يكون عندك هيك شي ولد يكون حدك بس تكبري؟
الجواب:معقول يا ماما هيك عم تفكري! إنو على قصة الولد في عندي أولاد خيي وبيفهموني، ليه حتى أنا جيب ولد؟! وبعدين من وين بدك جيب ولد إذا أنا ما بنام مع رجال؟
يتوقف وبتسألني: كيف يعني شو قصدك؟
الجواب: قصدي إنو أنا ما بحب نام مع رجال، يللي بيعجبوني هني بنات.
بترد: ما تحكي هيك حكي مرة تانية، شو هبلا إنت هيك بتقطعي نصيبك
المرة الثانية يلي حكيتها فيها وقلت يا ريت تفهمني هالمرة، كانت معي صاحبتي، قاعدين عم نتحدث كلنا سوا وفجأة ومتل العادة ما بعرف ليه عطول دعوة إمي لتحسسني إنو مهتمة فيني بتكون إنو تشوفني عروس…
وبما إنو كنت قاعدة حد صاحبتي وعم غنجها قدمها، قلت هالمرة رح تفهمني أكيد. قلتلها يا ماما والله ما رح إتزوج، شو بدك إرجع لعندك تاني يوم مطلقة؟
كمان بترجع تسألني ليه؟ قلتلها لأن ما رح نام معو، هالفكرة مش واردة هلق. إذا بدي كون مع حدا رح عيش مع بنت لأن هيك أنا بدي وبكون مرتاحة أكتر، ماما شو رأيك ب ” x” ( يعني صاحبتي يلي قاعدة حدي) بحبها وبدي عيش معها.
بترجع بتصدمني وبتقلي ايه شو هالهبل هيدا، إنت بس هيك “خالف تعرف”.
إنو معقول هيي كمان ما بتزهق من هالدعوة؟ أنا زهقت، ما هيي كل مرة بتسمع نفس الجواب، لازم تفهم إنو خلص ما في أمل مني!
هلق أنا بعتبر إنو صرت مخبرتها شي أربع مرات إنو أنا ما رح إتزوج رجال، وما رح يكون عندي ولاد قريباً. يعني صارت مشكلتها مش مشكلتي.
طيب هيدي أمي. بس يلي ما فهمتو هو ليه ولاد عمي وولاد عمتي وقتها كنا عم نتحدث عن موضوع اللزبيان والغايز (gays and lesbians) وعن الناس يللي بيتحرش فيهن جنسياً، ما صدقوني كمان؟ أنا وقتها قلت براسي بما إنو عم يحكو إيجابياً عن الموضوع، هات تا خبرهن عني، وهيك صار.
قلتلن طيب شو رأيكن إنو أنا لزبيان. إطلعوا فيي كلن وصاروا يضحكوا، وبنت عمتي قالت لو شفتك بعيني ما رح صدق، بلا مزحك هلق.
غرين
Leave a Reply