عدنا… والعود أحمدُ

نحنا منعرف انكن عتبانين، وفي منكن زعلانين وغضبانين على غياب “بخصوص” يللي صار فجأة. منعرف انو اشتقتوا ل”بخصوص”، بس صدقونا، “بخصوص” كما اشتاقتلكن، ونحنا اشتقنالها واشتقنالكن. بس المهم، انو “بخصوص” رجعت.

فريق “بخصوص” اجتمع لعدة أيام متتالية، ناقشنا فيها مواضيع أساسية كتيرة، وكان الهدف الأول واضح وصريح: عودة “بخصوص” اونلاين بأفضل حلّة وبأسرع وقت. وكمان كان همّ أساسي بالنسبة للفريق، تذليل كافة العقبات وازالتها، لنضمن وجود “بخصوص” دايما كل يوم ثلاثاء، ولنتفادى أي وضع ممكن يتسبب بغياب مجلتنا العزيزة.

اجتمعنا، وتناقشنا كتير بهوية “بخصوص”، وشو بدنا منها؟ شو أهدافها؟ كيف رح يكون شكلها؟ كيف منضمن استمراريتها أسبوع ورا أسبوع؟ حكينا كتير، احتدّينا، ضحكنا، تسلينا، بس أهمّ شي انو طلعنا بمجموعة قرارات وخبريات جديدة، منحب نشارككن ياها:

-          اضافة قسم جديد خاص فيكن لنرحب بكافة مقالاتكن وأعمالكن الفنية، مع سياسة تحريرية جديدة هون

-          اللجوء لأساليب جديدة (مواهاهاها) بتشجعنا عالانتاج والكتابة (وانتو كمان!)

-          تشجيع اللغة العربية (ولو عبر Yamli!)

-          تعزيز قدراتنا على ضمان الأمن الرقمي والشخصي لفريقنا

-          فتح المجال للمجموعات والأفراد الكويريات من مختلف أرجاء لبنان والعالم العربي للمشاركة ب”بخصوص”!

-          تقسيم العمل بطريقة تريح كافة أعضاء وعضوات الفريق لضمان أعلى مستوى من الانتاجية والراحة بالوقت ذاتو

-          ابتكار طرق جديدة لتسويق “بخصوص” أونلاين وأوفلاين، وتوسيع دائرة القراء/القارئات

-          استقطاب مجموعات جديدة من الكتاب والكاتبات من مختلف الخلفيات والأعمار والتوجهات

-          ومسك الختام: رح تشوفوا “بخصوص” مطبوعة قريباً! ايه ايه! رح نطبعها، ورح نطبع شي تاني كمان، رح نخليه مفاجأة بالوقت الحاضر!

ومنحب نقلّكن شي، انو كلامكن يللي كتبتوا من قلوبكن على صفحتنا عالفايسبوك، كان دافع كتير كبير وأساسي لرجعة “بخصوص”. لهالسبب، ما تنسوا دايما تحكونا.

انتوا حكونا ونحنا منسمعكن.

شكرا لكم ولكن!