“دروس “عشتارية

صحيح انت فليتي. بس قبل ما تفلي علمتيني اشيا كتير.

علمتيني انو ما ضروري أوعى 10 الصبح تا روح على البحر، وانو فيني أنطر للعصر تا ما تضربني الشمس.

علمتيني انو ما ضروري كل ليلة نسهر، وفينا نجيب فيلم حلو و”نكنكن” على الكنباية مع كاسين نبيذ ونحضر سوا.

علمتيني انو فينا ناكل أكل صحي بالبيت من وقت للتاني بدل ال”فاست فود”، وانو مش غلط نطبخ بيتزا وباستا للعشا.

علمتيني انو في لحظات فينا بس نغمر بعض على التخت، أو تحطي راسك ع كتفي، أو نبوس بعض، ومش أكتر من هيك.

علمتيني شو يعني حدا يجن على حدا بنص الليل.

علمتيني شو يعني سوق 160 تا أوصل لعندك مع انو بيتك مش بعيد.

علمتيني شو يعني لمن توقعي قدامي، حس قلبي وقع.

علمتيني كيف الاحساس بيجتاحني بنص الليل تا تكوني بين ايديي، انت بالذات، مش أي بنت تانية.

علمتيني انو الأكل الهندي طيّب كتير، ما عدا السبانخ بالجبنة.

علمتيني انو في قهوة تانية أطيب من النسكافيه فينا نشربها سوا الصبح.

علمتيني كيف أعرف شو بدك بلا ما تقولي، وكيف أعرفك من ضهرك من ورا بين كل الناس اللي قاطعين بعجقة شارع الحمرا، بس ما استرجي سلّم عليكي.

علمتيني شو يعني امحيكي عن ال”تشات” وعن ال”فايسبوك”، وامحي رقمك عن التلفون تا ما احكيكي، بس انو شو بعمل اذا أنا حافظة رقمك؟

علمتيني شو يعني ما تضطري تعملي جهد، بيكفي بس انك تكوني موجودة، بعيدة، بعيدة كتير، ساكتة وبعيدة، ووحيدة، بس متل كأنك مربوطة فيني.

علمتيني كل هالاشيا مش بقصدك، وبلا ما تعرفي. انت فليتي، بس هالاشيا رح يضلوا فيني.