أجمل تجربة غير منطقية
(6 votes, average: 3.67 out of 5)
Loading ...
كل ما بفكر كيف ممكن تكوني حركتي فيي كل هالإشيا كتير أسئلة بتخطر عبالي، أسئلة ما كنت لاقيلها جواب .
ما بفهم كيف أول مرة إيدك لمست إيدي بالغلط، صعقتني الكهربا وتحرك قلبي بشكل ما عرفته قبل هاللحظة مع أي حدا غيرك، ولا حتى مع اللي كتير حبيتهن وكنت مستعدة اقضي حياتي كلها معهن.
ما بفهم كيف شعرك ولبسك ومشيتك وحركاتك ومسكتك للسيجارة اللي كثير typical للمثليات، وبشوفهن كل يوم على 100 بنت غيرك، عليكي إلهن سحر خاص بخليني ما إقدر ما حس فيكي وإحلم فيكي وتكوني مركز إهتمامي الوحيد لما تكوني شي مطرح قريبة.
ما بفهم كيف كل إهتماماتك اللي أبعد شي ممكن عن إهتماماتي، وأفكارك اللي كتير متناقضة مع أفكاري بكل مجالات الحياة على أنواعها واصحابك اللي ما بيعجبوني، كل هادول ما خيبوا ظني ولا خلوني إزهق منك أو إبعد تفكيري عنك أنا اللي معروفة إني كتير perfectionist و picky وما بيعجبني العجب.
ما بفهم كيف لما يكون في أي فرصة إني كون أقرب منك بطحبش الدنيا كلها وبهمل إشيا كتير مهمة ما ممكن إهملها بأي ظرف ثاني بس كرمال كون أقرب منك حتى لو كان هدفك من هال “فرصة” 100% مصلحة.
ما بعرف كيف لما قلتيلي إنك مصاحبة ألف شب وصبية وإنك خنتي وخبصتي كتير، ما نزلتي من عيني، أنا اللي بلغي الشخص دغري من راسي بس أعرف عنه هيك شي. كنت مستعدة إكتفي بأي شي تعطيني ياه حتى لو كان ليوم واحد، لساعة واحدة أو حتى لحظة أنا اللي ما كنت بتقبل قبل هيك ولا بشكل غير العلاقات الجدية والطويلة.
ما بعرف كيف لما خبرتيني إنو الحبر الصيني نزل على أصبع إجرك وإنك كل ما بتاخدي شاور بتطلعي على اصبعك اللي صرلو شهر أسود وبتضحكي، بشي معجزة مش مألوفة فتحتي أبواب لعوالم جديدة في مخيلتي و صارت حواسي كلها تلقط كل شي فيكي حتى وإنتي بآخر الغرفة وتحسسني إنك لازقة فيي كلك وكأننا جسم واحد. دفئك وريحتك ونعومة بشرتك ونفسك بيسكنوني فجأة كل ما فتّي عالصف. و الهواء اللي حولنا بيصير عاصفة كتير مزعجة بتجرب بكل قوتها تبعدك عني.
مابعرف كيف خليتيني حب اللون الأصفر. ما بعرف ليه كنت مستعدة إدفع عمري كله تشوف غرفة نومك واغراضك. ما بعرف ليه كل أيام الأسبوع كانت بس نطرة للثلاثاء و الخميس و م أحد. ما بعرف ليه انهوست فيكي هلقد.
و ما بعرف ليه ولا مرة توقعت إنو تحسي بالإشيا ذاتها و إنو نكون سوا. و ما بعرف كيف تقبلت إنو بحياتك مش رفح تفهمي.
بس بعرف إنو هالإشيا اللي حسستيني فيها هي أجمل تجربة غير منطقية عشتها بحياتي ومصدر إلهام ما بيخلص.
- بقلم: مش منطق
Leave a Reply