أصوات” شاذة كتير”
(8 votes, average: 5.00 out of 5)
Loading ...
عندنا بأصوات، في اجتماعات شهرية منناقش فيها كتير مواضيع ذات أهمية. ومرات، اللقاء بيدور حول مشاكلنا اليومية وصراعاتنا مع المجتمع ومع الرجعية!
عندنا بأصوات، في دورات تدعيم متعددة، منها ما يهدف إلى تعزيز القيادة النسوية، ومنها ما يثير نقاشات حول الحقوق الإنسانية وحول حقوقنا كنساء في مجتمع يقدس الذكورية!
عندنا بأصوات، في “اليوم المفتوح” إللي فيو منعمل اشيا فعلية… منقرأ كتب.. منحضر أفلام.. منضحك ومنتجادل كمان! هاي الأيامات هيي تثقيفية وبنفس الوقت ترفيهيةّ.
عندنا بأصوات، من شي شهر أصدرنا “وقفة بنات”، كتابنا الجديد اللي بضم 22 قصة. كل قصة انكتبت علي ايد صبية مختلفة، انكتبت بطريقة جريئة ورفعت صوتها وقالت كل الحقيقة…
“وقفة بنات” بيثير نواحي مختلفة من مثليتنا العربية.
“وقفة بنات” هو كمان صرخة من صرخاتنا الأصواتية!
عندنا بأصوات في رحلات وفي كمان حفلات… احتفلنا بمناسبة يوم المرأة العالمي، واحتفلنا باليوم العالمي لمكافحة رهاب المثلية! وطبعا دايما بنطمح لتحقيق انجازات جديدة… وبعدها فورا منبلش نخطط لحفلة قريبة!
بتعرفوا وينتا صرت أقول “عندنا بأصوات”..؟
بهداك اليوم لمن حسيت حالي وحيدة وحسيت اني بحاجي لعيلة تدعمني وتحسسني اني بهالدنيا مش غريبة! دخلت على الانترنت وبلشت فتش عن قصص.. قصص صبايا زيي.. عربيات.. فلسطينيات.. شاذات!!! وبموقعنا لقيت قصتي مكتوبة بعدة أصوات!
لقيت قصتي مش شاذة… لقيتها موجودة بكل مخاوفها، بكل جرئتها، بكتير أبعاد وبكتير أشكال… وبوقتها..
تحول عندي الشذوذ لمثلية!!
الخوف تحول لفخر وبحث عن التغيير ولو حتى بسرية!!
الوحدة تحولت لعيلة صغيرة فيها فهمت انو لميولي الجنسية في شرعية.!!
الضياع تحول لهدف.. وصراع من اجل التحرر والحرية!!
وحتى خزانتي… خزانتي ما عادت أبدية!!
بوقتها فهمت انو في طريق جديدة! أصوات محل بيحويني.. بيدعمني وبيقويني ت حتى بشي يوم أرفع صوتي قدام الناس وأقولن :
“من صوت شاذ كتير لمجتمع رجعي مستسلم للتأخير،
كفى اعتراضات، كفى مرافعات، نحنا بشر ومن حقنا نعيش بحرية.. من حقنا ندافع عن حقوقنا بكوننا أقلية.. نحنا بشر من حقنا ما نعيش منبوذين.. وما نعيش مضطهدين.. من حقنا نعيش متل باقية العالم مكرمين.. وها هي قضيتنا…
مثلية.. فلسطينية.. وعربية”.
ومني الكن تحية نسوية
بقلم Di – أصوات
Leave a Reply