انت مثلية… افتحيلي شمبانيا

1,555 views

شو صعبة كتابة هالمقال!!
مش لأنو ما بعرف شو بدّي اكتب، بس لأنو ما عندي أحرف عربي ع زرار الكيبورد. عم بَصِّر. منيح في باكسبايس. ع هالمنوال، رح اخلص بكرا!
المهم انو رح احكي عن المرة يللي خبرّت فيها حالي اني “اوموسيكسويل”… مش اوتوسيكسويل الكميون، لأ، اوموسيكسويل، يعني مثلية الجنس.
ما بذكر ايا يوم كان. سبت مدري خميس، الا اذا كان جمعة، شو عرّفني؟ المهم انو يومها قررت انو خلص ما بقا بدّا، عيب، صار لازم خبّر حالي. انو وَلَو! عِشرة عمر، وفي خبز وملح وكم سندويش طاووق وفلافل بيناتنا.
بس كيف؟؟؟ شو الطريقة؟ كيف الوحدة بتخبّر حالها هيك خبرية؟ بركي رُحِت بالكوما؟ او بركي رَفَضِت الفكرة من اساساتها؟ وبعد في اضرب، بركي بطّلت احكي مع حالي؟ بركي بطّلنا اصحاب؟ يا الله، شو صعبة! شو بدّي اعمل؟
بس لأ خَلَص، ما بقا بدّا، صار لازم اعرف. مش معقول الوحدة تعيش هيك مطمّشة عيونا كل حياتها! وشو بدّو يصير يعني؟ صدمة وبتمرق. بعد ناقص اعتل همّ حالي. ما بِكفّيني يللي انا فيه؟
فنجان قهوة،  قطعة كايك، كباية مازهر، العدة جاهزة. يللا مير، حضّري حالك. افتحي دينَيك منيح واسمعيني: انتِ، يعني انا، انو انتِ…. اوموسيكسويل، يعني مثلية الجنس، م ث ل ي ة، يعني بتحبّي البنات.
فهمتي؟
؟
مير؟ سامعتيني؟
مير، بعدك معي؟ بليز ردّي عليي، قولي شي. ما تضّلك ساكتة، عبّري بليز بس ما تضّلك ساكتة!

-       شو بدِك ياني قول؟
-       حيالّلا شي، بس قولي شي.
-       مرسي.
-       مرسي؟! بس هيك؟ شو يعني؟
-       يعني عم بِشكرِك. خبّرتيني احلى خبرية. خبّرتيني مين انا. فتّحتيلي عيوني يللي اصلاً كانو مفتوحين، بس ما كانو عم يقشعوا. او يمكن كانوا قاشعين بس انا ما كنت عم شوف. ما بعرف. عطيتيني قنينة اوكسجين. لاول مرة من زمان، اتنفّست. حسّيت اني عايشة، عايشة وانا انا، مش حدا تاني. عطيتيني بطاقة هوية. باسبور للعالم كلّو، لعالم الحرية. سمحتيلي استعمل ضمير المتكلم، وقول انا. انا كاملة، مش نصّها مخبّى. شو بعد بدّك قول؟ …. لشو هالعدّة كلّا؟ مازهر وماورد؟ كنتِ خايفة عليي يغبّ ع قلبي؟ مجدوبة انتِ. هيك خبرية بدّها شمبانيا!

بقلم “مير”

Tags: Arabic عربي, coming out, homosexual, lesbian, self-acceptance, بريد عا مهله, تقبل النفس, مثلية