!شو كذّابة أنا

673 views

عالطالع والنازل بضلّني قول: أنا بكره العربي.

أصلاً أنا بكتب بالفرنساوي، وبقرا بالفرنساوي، والأضرب كمان، بفكّر بالفرنساوي.

اسمالله عليي، سيمون دو بوفوار زماني!!

وبعدين، أنا ما بحبّ أحرف ال “ض” وال “ع” وال “ظ”. بحسُّن متوحشين. إنّو كيف بدّي اتغزّل فيكي وبجمالك وبرقّتك مع هيك أحرف؟

ولشو هالغزل من أساساتو؟ انّو كل ما الواحد حبّ، بدّو يقبر التاني؟ يا تقبريني ويا تقبريني! رح يضل الرفش بايدي!

أفففف شو ما بحبّ العربي!

وأفففف شو كذّابة أنا!

إنّو مش عَ أساس غرامي اقرا “لولو وطبوش”… بالعربي.

ومش كل مرّة بروح عضهري ضحك لمّا احضر “فاديا الشرّاقة”… بالعربي.

ومش برتخي وبلشلش كلما اسمع غنيّة لفيروز يللي ما في سي دي إلا ما عندي إياه وما في مسرحية الا ما حافظتها… وبالعربي.

ومش إنّو أحلى قصيدة حب سمّعتلِّك اياها لمّن حطيتي ايدِك عكتفي ووقف الزمن عندي، كتبها نزار…بالعربي:

يدك التي حطت على كتفي                      كحمامة . . نزلت لكي تشرب

عندي تســاوي ألف مملكة                    يا ليتها تبقى ولا تذهب

ومش انّو آخر شي قلتو لمّن جرّبت أتغزّل فيكي بكل اللغات وما قدرت عبّر، كان كمان لنزار، وكمان بالعربي:

أكثر ما يعذبني في حبك..                       أنني لا أستطيع أن أحبك أكثر..

وأكثر ما يضايقني في حواسي الخمس..         أنها بقيت خمساً.. لا أكثر..

ومش انّو كل ما اتذكّرِك، بوجع بالعربي، وكل آخ بتطلع ملوى تمّي (مع التشديد عَ حرف ال “خ”)

ومش انّو كل ما شوف صورتِك، نَفَسي لحالو بيضهر من تمّي عم يقول، بالعربي: اشتقتلِّك.

ما بعرف اذا عن جد أنا بكره العربي.

يمكن لأ… أكيد لأ.

ما بكره العربي.

كل يلّي بكرهو، هو انّو قول “بحبِّك” وما اسمع جملة “وأنا كمان”.

Tags: arabic poetry, Arabic عربي, French, love