!خصخصنا العربي

926 views

بتعرفو انو اللغة العربية هي من أقدم لغات العالم؟

بتعرفو انو اللغة العربية فيها أكثر من 12 مليون مفردة، بينما اللغات اللاتينية فيها حوالي مليون ونصف كلمة فقط؟

بتعرفو انو اللغة العربية هي اللغة الوحيدة اللي بتتميز بامكانية اعراب كافة الكلمات في كل المواضع من الجملة؟

بتعرفو انو اللغة العربية هي أول لغة استخدمت الحركات لتحريك الكلمات يعني الضمة والفتحة والكسرة والسكون، وباقي اللغات أخدتها منها؟

بتعرفو انو اللغة العربية الها تأثير كبير جدا على عدد كبير من لغات العالم، منها العبرية والتركية والسواحلية والأوردو والهندية والفارسية والبرتغالية ولغات وسط آسيا وغيرها، وانو اللغة الأسبانية بتمرق فيها كلمة عربية بين كل خمس كلمات؟

بتعرفو انو حرف ال “ض” مش موجود إلا باللغة العربية؟

وبعد في كتير كتير مميزات للغة العربية.

بس السؤال هون هو: اذا عاللغة هلقد عظيمة، وهي لغتنا وحافظة تراثنا، ليش ما منحكيها؟ ليش ما منكتبها؟ ليش ما منستخدمها في مجتمعنا كمثليات ومثليين وأحرار الجنس؟

الجواب هو مجموعة اجابات:

-         الاستعمار والانتداب الفرنسي والبريطاني لمنطقتنا العربية، والشغل يللي اشتغلو ت يمحوا لغتنا من مجتمعنا ونظامنا التعليمي واداراتنا العامة ومؤسساتنا الحكومية والاجتماعية، ونجحوا فيه نوعا ما. اليوم، لبنان فرنكوفوني، ومصر انجلوفونية مثلا، مع انو اذا برمنا لبنان كلو، ما منلاقي في برج “ايفل”، واذا اتطلعنا على أهرامات مصر، ما بتشبه أبدا ساعة “بيغ بن” لا من قريب ولا من بعيد.

-         النظام التعليمي الموروث من عصر الانتداب واللي ما تم الشغل عليه لتطويره، ويللي بيكرس تعليم المواد باللغات الأجنبية، وبيقدم اللغة العربية بطريقة خاطئة للطلاب، بتخليهم ينفروا منها أو ما يفهموها ويكرهوها.

-         وجود فئة معينة (ومش زغيرة) تعتبر انو استخدام اللغة الأجنبية “كول” وع الموضة ودليل تطور، واللغة العربية دليل تراجع وتخلف.

-         وجود فئة معينة بتمشي ورا الفئة الأولى، وبتقلدها نتيجة الرغبة بالاحساس ب”التطور”، أو مجاراة الموضة، أو عدم الاحساس بالعزلة أو الاتهام بالجهل.

-         ضعف اللغة العربية عند كتير منا، بسبب ضعف مستوى تعليمها، وعدم ممارستها وعدم الاعتياد عليها، وهالشي بيخلي كتير منا يستحوا يقروا/يكتبوا أو يحكوا بالعربي.

-         وجود نظام عام، بما فيه الاعلانات وسوف العمل والجامعات والانترنت والخ… ما بيستخدم إلا اللغة الأجنبية (وتحديدا الانكليزية) وبيتجاهل اللغة العربية وغيرها.

-         غياب الكثير من المصطلحات الجنسية/الجنسانية عن اللغة العربية، بسبب اهمال المسؤولين عنها وعدم تطوير هاللغة وادخال التعديلات اللازمة عليها لمواكبة تطورات العصر.

-         معظم مجموعات المثليين والمثليات العرب، بتحصل ع تمويلها من الدول الأجنبية، وبالتالي بينفرض عليها مصطلحات ولغة معينة للتواصل مع الممولين الأجانب، بتتحول بعدين لحالة ثابتة وعادة منتشرة داخل المجتمع المثلي.

-         الاحساس عند الإنسان العربي بالضعف وقلة الثقة بالنفس قدام الأجنبي، والشعور انو الغربيين متقدمين ومتحضرين، وبالتالي لازم نقلدهم بطريقة الحياة واللغة وكل شي.

-         عدم الاهتمام من قبلنا باللغة العربية ومعرفتها والتعرف عليها ونشرها، والاستسلام لجهلنا وعدم الاصرار على التغيير والعمل على تحسين لغتنا.

هلق بلا كترة نق، منروح ع المفيد دغري: كيف فينا نغيّر؟

فينا نغير أول شي بقرار واضح وحقيقي وصادق انو بدنا نخصخص العربي! لازم نكون فخورين بلغتنا، لأنها لغة عريقة عظيمة، والأجانب عندهن هوس يتعلموها. لازم ما نستحي اذا ما منعرف، ونسأل، ونقرا، ولو بلشنا بروايات وكتب بسيطة، لأن العيب انو ما نبلش أبدا. لازم نسأل الناس يللي حوالينا يللي بيعرفوا عربي، كيف فينا نطور حالنا، وشو لازم نقرا. لازم نبلش نكتب، لو غلطنا مرة واتنين وعشرة، مش عيب، العيب انو ما نجرب أبدا. لازم نصر على استخدام اللغة العربية، مع أصحابنا، مع أهلنا، بالاعلانات، عالفايسبوك، على ال MSN، بالشغل، ب”بخصوص”، بالمطبوعات المثلية يللي منصدرها نحنا، بورشات العمل يللي مننظمها. هيك منبلش، من هلق، من هاللحظة. حدا لحالو ما في يعمل شي، لأن اللغة العربية مش اختصاص، هي ثقافة، ومسؤوليتنا جميعا ننشرها.

ما عم قول بدنا نلغي اللغات الأجنبية، لأنها موجودة وفارضة حاليها علينا، وهي لغة عالمية ضرورية لنتواصل مع العالم خصوصا بهالعصر. بس كمان ما نلغي حالنا، ما ندوب بالأجنبي، ما ننسى لغتنا وندفنها. العربي كنز، اجا الوقت يللي نحفر ونكتشفو.

** تحتفل “بخصوص” هذا العدد بكل مقالاتها باللغة العربية احتفالا بها وتكريما لها، وتشجيعا للجميع على الكتابة بها واستخدامها. وأتوجه بتحياتي الحارة وقبلاتي لكل من ساهم/ت في اعداد وكتابة واصدار هذا العدد، لأني بعرف قديش كان صعب عليهن، بس عملوا.

Tags: Arabic عربي, Gay, language, lesbian, queer