تعا لشوف

1,069 views

شو هاي “انتو”؟ و”اللي مثلكن”؟؟؟
ايه؟ تعى لشوف، وشيل هالاصبع من وجي احسن ما شيلك انت وياه…
“اللي مثلنا”؟؟؟ شو هاي “انتو” و”اللي مثلنا”؟

ايه نعم، بكل اصرار نحن مثليات ومثليين يا خيّي…
انه شو يعني؟
صرنا شي بلا مبادىء؟
شي بلا اخلاق؟
شي ما عنّا قيم؟
شي انه بايعينا وماشيين ومدري ورا شو راكضين…
شللي الاخلاق واصبعك ع جنب… وحاج تأشر…
هيدا اصبعك اللي ماده صوبي
اذا بتطلع بايدك في ثلاثة غيره عم ب دلّلوا عليك انت…
اصبع واحد صوبي ليقول: مثلية…
والثلاثة الثانيين صوبك ليقولولك:
بلا هبل، بلا خوت، وبلا عقل كمان…

حاج تقلي “انتو”…
انه خراب الروابط الاسرية من ورانا، مش من ورا خلل مخك ومجتمعك…
وشيل اصبعك….

انه يا الله، ما عاد في اخلاق…. وندب وشلي وتعتير… هاي كمان بسببنا؟؟؟؟
شيل اصبعك واسمعني: يا خيّ الاخلاق مطرحها فوق، ونحن اخلاقنا بعدها بمطرحها الطبيعي… فحاج تقيّملي هالاخلاق اللي عندك من غير مطرح… من غير مطرحها الطبيعي… شلي اخلاقك واصبعك واسمعني…

ايه انا مثلية…  وبعدين؟؟؟ حاسس حالك مهدد؟؟؟
انه يعني اجاك همّ جديد هلق؟
كنت تخاف ع اخواتك من الرجال، هلق صار بدك تخاف عليهن من النسوان كمان…!!!! روح خاف ع حالك من حالك وعقلاتك… كبار، وكبّر عقلك…

شيل اصبعك عم قلك… وشيل هالاحكام والافكار اللي حاملها معك من ايام حرب الفلّين وجاررها وراك وانه يا با شو، هيدا المظبوط هيدا الصح وهيك لازم يكون وهيك لازم يصير وما بعرف شو…
شي واحد لازم يصير، في واقع لازم تقبله وتتقبله، حتى لو كان مخك هالكبير مش قادر يفهمه…
ما فيك تمنعني مين بدي حب، ولا تحملني جريمة لاني حبيت، او بحب مرا، مثلي… شو مشكلتك مع اني حب مرا، ما انت كمان، اللي بتحبها مرا… شو المشكلة….

اكبر مشكلتك يا صاحب النظريات العظيمة، انه انا وانت اللي منحبها هي “الامرأة”… منك قادر تقبل هالشي… لانه حتى بالحب بتعتقد انه فيك تحتكرها وانت وحدك اللي بحقله يحبها…
لاء…
انا مرا، واللي بحبها مرا…
شيل اصبعك وكبّر عقلك، نحن عم نقدم… وانت عم ترجع لورا…

Contributed by Ma 7ada

Tags: thoughts