ما بدّي تحبّيني

1 Star2 Stars3 Stars4 Stars5 Stars (10 votes, average: 4.10 out of 5)
Loading...

7,771 views

رح يصرلنا شي ثلاث أشهر ما شفنا بعض. وأنا ما بسترجي إحكيكي كرمال ما ضايقك. بنطر مرة بالشهر تسلمي عليي واتسائب.

أنا ولا مرة طلبت منك تبادليني مشاعري أو حتى تحبيني. ولا مرة كان بدي منك شي أكثر من إنو  تسمحيلي أنا حبّك.

كرمال هيك، أنا هلق مش عم بكتب حتى قلك خلينا نرجع، وأعمل دراما وحنّنلك قلبك. أنا فاهمة إنو نحنا مش زابطين سوا.

آخر مرة قلتيلي إنك “بتحبيني كثير”… بس كصديقة. أصرّيتي إنو نضل أصحاب لما غمرتيني وكنت أنا عم ببكي متل الولاد بين أحضانك. بعرف إنك ما بتكرهيني وإنو ولا لحظة قصدتي تأذيني، وولا مرة قبلتي إبكي بسببك، وبعرف إنك بتنظريلي إني شي حدن كثير بريء وما بتحبي تزعليه. وكمان بعرف كثير منيح إنك مش قاسية. وإنك أطيب قلب التقيت فيه.

بقى ليش هالقسوة بالتصرف معي؟  ليش هالبعد وهالصمت كله؟ أنا شو عملتلك؟

كل اللي بدي ياه إنك تكسري هالجليد يللي بيناتنا وتخليني كون شوي قريبة منك.

بدي تسمحيلي إهتم فيكي، لما إنتي يكون عبالك.

لما تكوني تعبانة من الشغل إحكيكي وضحكك أو إبعتلك شِعر لنزار أو أعمل حيالله شي يفرحك.

لما يكون حدا سامملك بدنك، إحكيكي واتسائب  وقلك بدي دعوسه وكسّرله راسه وإفرمه متل البقدونس وقطّعه متل البندورة وفرفطه متل البصل وأعمله تبولة.

بدي تسمحيلي إكتبلك شعر وإشيا حلوة تقريها وتمبسطي فيها متل قبل.

بدي لما تكوني مش مشغولة، نلتقى. نشرب كاس بالحمرا سوى أو ننزل على عين المريسة. ونحكي عن إشيا بتضحك ونسمع أغاني حلوة.

وبدي أنا ولّعلك سيكارتك، وأرجع لما تخلصي حطّلك على إيديكي Hand gel وإفركن وضلّ بوّسهن… متل قبل.

وقبل ما فل إذا طلعلي غمرة بريئة صغيرة منك بتكوني ملّكتيني الدنيي كلها، ونحن لكم من الشاكرين.

بدي إنك تكوني عارفة إنو في حدن دائماً حدك وبحبك كثير بصدق،  ومستعد لأي شي كرمالك ومش ناطر أي مشاعر منك بالمقابل.

بدي لما شوف ستايتس مهضوم حاطتيه على الفايسبوك إقدر حطلك لايك أو تعليق بلا ما كون خايفة إنك تفكريني عم حركش. لأنو إنتي لما تحطيلي لايك على شي بصفحتي،  بكون عندي عيد وبكون عاملة مهرجان وبصير كل نتفة فوت إتفقد إنو اللايك بعده.

لأنو كل شي إلو علاقة  فيكي هوي بالنسبة إلي مقدس.

بدي تضلي تعرفي إنك إنسانة رائعة وإنو وجودك هوي أحلى شي بهيدي الحياة.

أنا بعدني بحبّك جنون، لأنو مش عم بقدر ما حبك صراحة. شو بعمل إنتي ع سلامتك وما في منك والله وكل شي فيكي بينحب.

وبتعرفي منيح إنو جنوني رايق. وإني دايما إيجابية. ولا يوم بضغط بشي عليكي.

أبداً ما رح ضايقك أو حسسك إني بغار حتى لو خبرتيني عن حدا تاني بتحبيه. وحياة أغلى شي عندي إني رح كون طايرة فرح لما أعرف إنك مبسوطة، حتى لو مش معي.

وإنتي بذات نفسك قلتي كذا مرة عني إني حدن ولا مرة أذاكي بكلمة أو جرحك أو ضايقك بأي شي.

يعني بتعرفي إني مش رح سببلك اي إزعاج.

أنا التجربة كلها كانت قاسية عليي. ما بدي إحكي هلق قديش تعذبت وقديش عانيت. وما عندك فكرة عن الجحيم يللي عشته وبعدني عم عيشه.

وتذكري إنو الحياة قصيرة كثير، وما فيها شي بيحرز.

 

 بقلم Camelia

Leave a Reply