اليوم سألتك قديش بتحبيني؟
(7 votes, average: 5.00 out of 5)
Loading ...
اليوم الصبح متل كل يوم، سألتك قديش بتحبيني!
صدفت كنتي عم تلعبي بخاتمنا، وقلتيلي بتحبيني “هلللللقد”. “هلقد” قد الخاتم يعني. وكنت زعلت لو ما بعرفك أكتر من حالي، وبعرف إنك قصدتي إنو حبنا متل كل دائرة، بتبلش من نقطة وما بتخلص.
ما بعرف كيف، مع كل الحيطان يللي عمرتها والأسوار يللي حصنتها تا احمي حالي، جيتي وبلا ما تخوفيني من حالي سرقتيني، وهيك مع كل طلعاتي و نزلاتي و مع كل فصماتي و جنوني حبيتيني. أنا مني شاعرة وبصراحة الشعر بضحكني، العواطف بالمطلق شي بضحكني، بس كل ما تكوني حدي بطلع فيكي وما بصدق قديش أنا محظوظة، إنو انتي، مع كل هوس الكمال عندك، وأنا يلي أقل انسانة كاملة على وج الأرض، مع كل فركشاتي بإجريي، والاشيا الغبية يلي بتطلع من تمي، متل ما أنا حبيتيني .
طيب شو منعمل بالحب؟ هيدا الشي يللي قد ما في منو ما عم نعرف نخبيه. بيطوف ايام بنظرة أو بابتسامة نحن وعم نجرب نخبيه، ونتخبى بخيال أصابعنا. في كتير عالم بحبونا سوى، بيعرفو إننا رفقة، بس بحسوا إنو في شي أكبر وأبعد بكتير، بس ما بيعرفوا يلبسوه صفة أو يعطوه إسم. وفي عالم قاعدة هلق ببيوتها ما بتعرفنا، ما بتعرف شي عن حبنا، وبتقضي عمرها عم تحكم علينا، عم تخاف منا، وعم تجبرنا نتخبى بخيال أصابعنا بإسم الطبيعة والطبيعي. رفقاتك بالشغل ما بعرفن، منخاف يلاحظوا يللي ما بيتخبى. وكيف فينا نخبي شي هلقد كبير وهلقد قديم ومشرش وربيان علينا بعد هالعمر. عسهراتك بالشغل ما بتاخديني، بأية صفة رح روح؟ بالنسبة لالهن، مين أنا؟
مش مسموح كون أكتر من صديقتك يللي تقريباً بتعيشي معها وتقريباً ما في مرة بيلتقوا فيكي وبتكوني بلاها.
و على ضهراتي بالشغل وبالعيلة ما باخدك معي، مع إنا متفقين إنو هيك أوقات هي أكتر أوقات بحقلنا نكون مع بعض، بإسم يلي بيربطنا. وهي أكتر أوقات بدنا نكون فيها مع بعض، تا نضحك سوى على الأشيا يلي بتوترنا وبتزعجنا. بكل عرس بدي تكوني معي، تا نتفق قديش الأعراس سخيفة. وبكل عشاء شغل بدي تكوني معي تا تحطي وجوه لناس كل يوم بخبرك عنهن. وبكل زاوية بدي تكوني معي لأنك بيتي يلي ما بعرف كون بلاه، ولو بعرف، ما بدي كون بلاه، لأنك الوصفة السرية بكل الاشيا، بتخلي كل شي يصير أطيب وأحلى، وايام منكون قاعدين بنفس الغرفة، إنت عم تلعبي على تلفونك، وأنا عم بشتغل على أبحاثي بلا ما نحكي. كل وحدي مننا بمساحتها الخاصة وبكل بساطة، ما بكون بدي شي تاني من الدني.
انتي مش من من نوع يللي بفرجي عوطفو بالعلن، ولا أنا. الموضوع خيار شخصي، بس ما منقدر ما نغار لما نشوف شاب وبنت قاعدين بالعلن وعم يعلنو لكل البشرية إنو هني سوى. طيب شو الفرق بينهن وبيننا؟ مش رح يحبو بعضهن أكتر منا، الحب ما إلو مقياس، ومش رح يكون صرلهن سوى أقدم مننا. الفرق إنو نحنا بنتين والمجتمع بخاف مننا، عندو قوانين ضدنا، وبنام وبقوم عم يوصمنا.
أنا مش من العالم يلي بدافعو عن حريتهم الجنسية بإسم الحب، وبصراحة ما بفهم شو خص إنسان بحياة إنسان أخر، مع مين ينام أو مين يحب أو مين يستحلي. و ما عم جرب إشحد حقي اني كون معك وحبك بإسم حبنا يلي مننسى إنو حقنا الشرعي. بس عم بكتب لأنك بتطوفي مني ايام،لأنو في اشيا كتير بدي خبرها عنك، متل شكل عيونك لما تنعسي، متل أول ابتسامة لإلك بعد قهوة الصبح، متل لما تنزعحي أو تنوجعي أو متل لما تضحكيني لحد ما ابكي.
عم بكتب بس لأكتب، بس على شرف إنو بعدني بعد سنين بكتشف قديش بحبك، واليوم اكتشفت إنو لما تبتسمي، عندي بتشرق الشمس.
Leave a Reply