“الحق عليكي… اذا ما عملتي ثورة”

انتي وماشية بالطريق حطي راسك الأرض.

إذا حدن لطشك بالطريق ما تردي – انتي بنت عيب.

ششش أوعى تخبري حداً. شو بقولو الناس عنا !

الحق عليكي! انتي أغريتي! شايفة كيف شكلك أكيد رح يغتصبك!

الحق عليكي انتي استفزيتيه تا يضربك

الحق عليكي! ضروري تضهري من البيت، ما بدك تسمعي تلطيش، ما تضهري.

هيدي دوامة. نحن كنساء بلبنان عايشين بدوامة “الحق عليكي”.

إذا انضربت، الحق عليكي، إذا اغتصبت الحق عليكي، إذا حب واحد مارق على موتو يمرق ايدو ع طيزك وهرب، كمان الحق عليكي، طيب معقول إنت كمان ماشية بالطريق و بارمة طيزك؟ لازم إذا ولا البد ضهرتي من المطبخ على الدكانة، تمشي بطريقة ما تبرمي طيزك لحداً

وبعدين بعد ناقص تصير المرأة تعطي الجنسية لأولادها! كأنو ناقصنا فلتان.
ليش هي يلي خلفتهن؟ هي يلي ربتهن؟ الحق عليكي، حداً قلك تتجوزي رجل مش لبناني؟

غير بالمسخرة، كيف بوصف ثقافة الذنب العنصرية والعنيفة وغير المنطقية يلي تربينا عليها لدرجة إنو ما بقى
نفكر حتى إنو معقول هيدي الأفكار تكون هبلة وغلط! هيدول العالم يلي بسمعّو هيدي الأسطوانة تبع “ألحق عليكي”  سامعين حالهن عم يحكو شي؟ عم يحكوا ومقتنعين كأنو شي طبيعي من البديهيات?

وما في أحلى من اللحظة يلي بتوقع المصيبة وقتها بكون عم بتحدث أنا واصدقائي مع أحدى النساء وبتلاحظ هي قديش في كمية كبيرة من كره النفس بالطريقة يلي عم تحكي فيها عن النساء! لحظة “اليقين” بسميها! بتصفن نص لحظة، بتسكت وبطلع فينا، ويمكن لأول مرة بحياتها بتسمع حالها عم تحكي! والحكي ما بيعجبها!

ما بتخجل الذكورية من التاريخ؟
أكبر دليل على الضعف، هو تحجيم الأخر لنشعر بالفوقية، وبالرجولية! وإذا منفكر منطق ومنحلل، هيدا أساس النظام الذكوري! من الذنب “للأنوثة” للسترة  للعيب. العيب! بتضحكني كلمة عيب.

العيب هو مبدأ الذكورية اخترعتو وما بتعرفو. لأنو الذكورية ما بتعرف العيب! الضرب مش عيب؟ الإغتصاب مش عيب؟ القوانين اللبنانية مش عيب؟ والتلطيش مش عيب؟ لكن شي العيب. والأحلى شي؟ إنو كل حقوقنا البديهية عيب! الجنس عيب. الضحك على صوت عالي من كل قلبك عيب! تكوني انتي عنيفة حمايةً للنفس عيب! عيب عيب عيب. عيب علينا نسكت بقى.

بتعرفي الأحلى شو؟ إنو كل الرجال الذكوريين بيدعوا انهم مع المرأة تاخد حقوقها! اه بس مش مع تحكم بالبرلمان، ولا مع تصير مديرة شركو، ولا مع أية منصب أو دور إجتماعي بخليكي تبيني ذكية وتحققي نفسك! اه بس هني مع حقوق المرأة، حقوقها بالطبخ بركي، تحط بهار بدل الملح، وبركي حقها بارضاع الولاد والتنظيف!
شكراً مشكورين والله