“برجك اليوم مع العالمة الروحانية “تراويح

اكتشفت “بخصوص” منذ أيام أنو بالإضافة لمواهب التكنولوجيا والكتابة والرسم والتصميم والحركشة والسآلة الموجودة بين أعضاء فريق العمل، فيه موهبة التبصير والتنجيم. العالمة الروحانية “تراويح” قررت تبدأ بفتح النصيب وضرب المندل ورصد الفلك. وبما انو الشتوية ما شكلها جاية السنة، رصدت العالمة الروحانية “تراويح” السماء الصافية من كم يوم من على سطح منزلها الكائن على “فينوس”، ولاحظت التقاطع بين كوكب “الزهرة” و”المريخ”، والتباعد الحاصل بين كوكب “المشتري” و”زحل” على الأرجح بسبب تغير المناخ. على كل حال، بلا طول سيرة، برجك اليوم:

الثور

عزيزتي الثور راسك الزغير كتير كل العالم بتتحملوا، وعنجد انتي شخص كتير سهل التعامل معو، وهدوءك وعدم تعصيبك على كل موضوع مهما كان حجمو كبير بتجذب العلم إلك، وبتخلي القعدة معك  خالية من الطاقات السلبية ووجهك البشوش بدخّل الضحكة إلى قلوب العالم.

عزيزتي الثور هذه الجمعة مليئة بالمفاجأت، يعني شو بدي خبرك. بيك رح يزعبك من البيت عشان انتي إنسان راسو مش كبير وبيّك بدو بنت تكون إم راس كبير. حبيبتك رح تتركك لأنها “حمل”. بس ما تخافي الشغل تمام ما في توتر ولا شي، عندك ٧٠٨٧٥٠٨٣٤٦٥٨٩٧٣٤٦٥ شغله تعمليها، بس انتي لها إذا بدك *رولنغ ايز* .

الجوزاء

عزيزتي الجوزاء عنجد انتي انسان بس ياخد قرار مستحيل يغيرو. عارفي شو بدك بالحياة وما عندك جنس الإنفصام، وأعصابك الرايقة ما حدا عندو ياها، ايه صدقي عنجد عنجد عزيزتي. بالنسبة للعمل، وظّفك أو لأ، محتارة معك والله . رح تتركي حبيبتك بس كمان ما في داعي للخوف لأن رح تطلبي ايدها للزاوج. حظك ما كتير منيح هالجمعة بس إذا بدك تقومي بأية مشروع يالله عزيزتي بلشي في لأن إذا ما بلشت في هلأ رح تضلي تقولي بدي وما بدي.

السرطان

عزيزتي السرطان يعني ما بعرف شو بدي قلك، قلبك القاسي لازم تشتغلي عليه شوي، ما بصير شي إذا بكيتي شوي بس شوي، من وقت لوقت. صدرك الرحب بتقبل الخسارة بحمس الكل يلعب معك، إنت اللي اخترعتي “الروح الرياضية” و يا ويلي شو سهل الشغل وتعامل معك. نصيحتي إليك هالجمعة ما تنجري بمشاعر الذنب اللي العالم رح تعملك هي. لأن انتي ما بتعمليها بحدا، وما لازم ترضيها على حالك. هالجمعة رح تلاقي الحب، بس رح يهرب منك. على صعيد العمل مافي شي، إي إي على شي.

الاسد

عزيزتي الأسد انتي لست بقائدة، وما عندك مشكل بالموضوع. انتي بتفضلي تتبع الناس على انك تكوني القائدة. ريشك مش منفوخ، أصلاً انتي ما عندك ريش، انتي التواضع بعينو لمن طلعلوا جلد وعظم. عزيزتي الأسد  إنت هلق  بوضع مادي صعب بس ما تخافي، أول الشهر رح تفرج، لأن جاييكي معاشك. خلي أعصابك رايقة هالكم يوم كرمال صحة كبرياءك .  إذا نزلتي تسهري هالجمعة انتبهي على راسك لأن كتر لفت الإهتمام يمكن يسبب 50 بنت لاحقتك بس أكيد أكيد إنت منك مزعجة، و رقم حظك هو “البنات” .

العذراء

عزيزتي العذراء، انتي إسم على مسمى، انتي البراءة والتواضع، وأنت شخص يحب الحوار. صحيح إنو صعب الحكي معك أوقات بس أوقات تانية ما عندك مشكل انك تقولي رأيك، هل أنت شخص يفرض رأيه على العالم؟ حاشى وكلا. توقعاتي لك، سوف تفقدين عذريتك قريباً مع شخص رائحته بشعة ويمكن تحلفي ما بقى بدك تعملي سكس بحياتك، خليكي بعيدي عن الثور لئن ما رح توقف محاولات إنو تنطحك.

الميزان

عززتي الميزان إنت صاحبة القرار دايماً، ما بتقبلي حدا يقرر عنك ودايماً عارفة إذا بدك أو بدك. إنتي ميزان عنجد، إذا حطيناكي على نار بتمشي جالسة. عزيزتي اخر هالجمعة جايتك مفاجأة، يمكن الحبيبة تجي، أو تسافر وترتاحي منها. يمكن تنحطي بموقف بشي وتضطري تقرري وين بدك تاكلي إنت والحبيبة، ورح يكون موقف كتير بشع بس قوي قلبك  وقرري وبس بدي قلك إنو القمر بالمريخ وهيدا الشي رح يلعب لحظك بهاللحظة. رقم حظك هو 0 و ما تتعاطفي مع ولا أي برج ما حدا بيستاهل ضياعك بالحياة وعدم توازنك .

العقرب

عزيزتي العقرب، انتي شخص متواضع عندما يتكلم عن نفسه، لكنك متشائمة كثيراً وتفكيرك سلبي عن الحياة عامةً، انتي شخص طويل القامة وضعيف الردفين. وانتي تكرهين الناس للي بيتصرفوا على أساس “يا أرض اشتدي ما حدا أدي”. توقعاتي لك، كلي الكثير من التفاح، وشربي القليل من الحليب، ولا تبكي عندما يكون عيد ميلادك وما حداً يعبرك أصلاً إنت ما رح يهمك لئن إنت اخر همك إذا العالم بعبرك أو لأ.

القوس

(يعني ما فيني ما خلّي يللي كتبتو عشتار!)

القوسية هي انسانة متقلبة متشعبة متعلبة متشقلبة، بتحب اللعب ع الحبال بس دايما بتنصاب بسهم من قوسية أخرى وبتوقع ع راسها شك. صحيا، تعاني القوسية من آلام في الخواصر نتيجة الضحك المتواصل، وآلام في الرأس نتيجة الفوتة بالحيطان بسبب التيسنة، ومن آلام المعدة نتيجة الغثيان الناتج عن الهوموفوبيا، وآلام العيون نتيجة البصبصة. في الحب، تتميز القوسية بحس المغامرة والسفر من كوكب (علاقة) الى كوكب (علاقة أخرى) بسرعة الضوء.، لكنها في الوقت عينه حساسة نسناسة قنّاصة وأحيانا فنّاصة. على صعيد العائلة، تطمح القوسية الى عدم بناء أسرة أبدا، لأن هذا يحد من قدرتها على النطنطة التي لا تنتهي أبدا بالحطحطة. رقم الحظ (يقرر لاحقا حسب ورقة اليانصيب الرابحة) اللون المفضل (لون الشمس وقت الغروب).

الجدي

عزيزتي الجدي،  إنت البرج الوحيد اللي بيحكي عن المشاعر كل الوقت، إنتي كتاب مفتوح. عندك عدم تركيز بأمور شغلك،  وهيدا الشي بيتسبب بفشل دائم بحياتك المهنية بس أكيد ما عندك مشكله تعملي ثورة بأوقات فراغك . توقعاتي لالك انو في حب جاي تجاهك وإنت ما عام بتشوفيه، الهيئة زايد ضعف النظر عندك . يا حبيبتي يا عزيزتي لازم تتعاطفي مع الثور، علاقتكٌ المميزة لازم تحافظي عليها عشن ما حدا بهالدني بدو يعصب الثور . جاييكي فرص عمل فظيعة هالكم يوم بس كمن ما رح تشوفيها لأن بدك تغيير عوينات . المواليد الأسوأ حظاً هني 20  كانون الثاني الساعة 12 بالليل. (ملاحظة: لطشة)

الدلو

انتي شخص رحب الصدر، في العلاقات أنت دائماً موجودة عقلياً وسهل التكلم معك في أية وقت حتى لو كنت جائعة تكونين جاهزة للتكلم، حتى وأكرر، حتى لو كنت جالسة على الكمبيوتر . أنت انسانة واقعية ولا تعيشين في الأحلام. توقعاتي لكي مثلك واقعية سوف تجدين فتاة وسوف تقعين في غرامها وتعيشان أحلام جميلة، بس بعتذر، رح تتركو بعد يومين. في مجال العمل، عليك أن تتركي جوجل شوي وتركزي على شغلك. لكن أهم شي أنه سوف يحصل شي غريب في حياتك الأيام القادمة، يمكن تتزوجي أو تتطلقي أو تغيري شغلك أو تحصلي على شغل جديد. الأكثر حظاً مواليد شهر شباط 1,2,3,4,5,6,7,8,9,10,11,12,13,15,16. (ملاحظة: لطشة تانية)

الحوت

عزيزتي الحوت، المظلومة، المتفهمة جداً، العالم هو يلي ما بيفهمك. إنت بتعملي جهدك لتتواصلي مع الناس حواليكي بس هني ما بيفهموكي، و غير راضين يتقبل مجموعة شخصياتك الرحبة. عندي كم شغل بدي شاركن معك وإنتي لازم تنتبهيلن، العالم حواليكي ما عام بحاولوا يقتلوكي، والله ، إذا حدا إبتسملك بتسميلو. الحب جاي تجاهك بس إنت ما رح تنتبهيلو لأن رح تكوني مشغولي في البحث عن المساحة الشخصية الخاصة بك.  أرقام حظك 45937245876 و 897358705 .

الحمل

عزيزتي الحمل، عين الحسود فيها عود، جمالك وذكائك قد أذهل العالم و تواضعك هو السبب. الأيام ال 7 القديمة تحمل لك الكثير من الحب والغرام مع إنو حبيبتك تركتك و الناس كلها بعلاقات إلا إنت. بس لا تخافي عزيزتي ااحمل الحب في انتظارك يمكن مع شي حمل متواضعة متلك، لأن انتي ما بتستاهلي إلا حدا متواضع متلك. في مجال العمل، جايتك ترقية هائلة أو يمكن تنكحشي من شغلك، وإذا كنتي يا عزيزتي الحمل عاطلة عن العمل، شوفي بربر أو كافيه يونس لأن غير هيك ما في شغل هالأيام . (ملاحظة: مش لطشة أبدا)