رسالة الى فرانسيسكو

في ما يلي رسالة أرسلها رجل الى حبيبه المسافر…

يا حلو…

لا تعتب عليي أخرني القمر. ضيعتنا هنية و طالعلا السهر. يا خجلت عنيي لو يعرفو فيي. لومك مش عليي لومك عل القمر. قلتلك حميني من الهوا. ما تاري سوا، إنت وهالهوا إتفقتو عليي وما عندي خبر. إنت مش حدا ولا إنت العِدا إنت البعِنَيي رابي من الزمن.

رح خبرك قصة. لا القصة صحيحة ولا الضيعة موجودة.

قديش كان في ناس عل المفرق تنطر ناس وتشتي الدني ويحملوا شمسية وأنا بإيام الصحو ما حدا نطرني. ضجرت مني الحيطان ومستحية تقول وأنا عيني عل الحلى والحلى عالطرقات غنيلو غنيات وهوي بحالو مشغول. نطرت مواعيد الأرض وما حدا نطرني.

بقولوا الحب بيقتل الوقت. بقولو الوقت بيقتل الحب. يا حبيبي تعا تنروح قبل الوقت و قبل الحب.

بديت القصة تحت الشتي بأول شتي حبوا بعضن.

فايق ولا ناسي؟

في قهوة عل المفرق في موقدة وفي نار وكنا أنا وحبيبي نفرشها بالأسرار. فايق شو تمشينا بالليل عالطرقات؟ شو رحنا مضَّينا بضّو القمر سهرات؟ فايق عل التنزيهة بالقهوة الي عل مي؟ نبقى نقعد فيها وستاير زرقا شوي،وعل الحمر الكراسي. فايق ولا ناسي؟

كانت عم تشتي. ولوما وقفت ترنخت. شو هم، كنا صغار.

غَمَرني مرتين وشد. مرة مليح، تنين؟ مشوار رافقتو أنا مشوار. مشوار يا عيوني مرق مشوار. مشوار شفتو وما رجع مشوار. مبارح بنومي بصرت إنو ع زندو طرت والأرض مفروشة كلا ياسمين. إن صح الحلم شو صار؟ مشوار جينا عل دني مشوار. أنا ما بدي تجي وتقول إعذرني مشغول لفتي من بعيد بتكفيني وقلبي إلك على طول.لا توديلي الزهر سلال وبالشوق تجرِّح موال. بس سألني كيف الحال. سآل سآل.

كنا نتلاقى من عشية ونقعد على الجسر العتيق وتنزل على السهل الضبابي تمحي المدى وتمحي الطريق وما حادا يعرف بمطرحنا. غير السما وورق تشرين. ويقلي بحبَك أنا بحبَك ويهرب فينا الغيم الحزين. خِدني ع بحر جبيل. بليل وأوضة منسية وسلم داير مندار هب الغربي وطاب النوم وأخدتنا الغفوية. سألوا كتير علييِّ على جسر اللوزية. ندهونوا وما عينا. لامونا وشو نفع اللوم غصب نعنا غفينا. يا حبيبي تنينتنا غرب، ليل ودرب بعيدي. رح يسرقني عتم الدرب هدِّي إيد بإيدي. وقلك أنا بحبك وقطف نجوم وقطف إزرعهن بدربك وقلك أنا بحبك أنا بحبك. تقلي إنت لا تعلِّي وقلك بعد بدي، بعد بدي. يا حلو… قلبك طاير فيي وأنت طاير وقلبي هالملَبَك يسافر على دربك و بخيال شي غنية قلك أنا بحبك. أنا بحبك.

يا حلو… شو بخاف إني ضيعك تمرق على الجسر العتيق وتروح مني بهالطريق. لوين لا تقلي ولا تاخدني معك. شو بخاف بليلة عاصفة يخطر عبالك شي نجم وتقوم تمشي بهالعتم وأنطر أنا عل باب أنطر خايف. خدني على قلبك معك. بيني وبينيك يا حلو شو صار في حكايات ما في كلام يساعها منقولها لفتات.

قلي يا ماشاالله يلَّى كبار يالله، تنجيبك لعنا. يا ريت إنت وأنا بالبيت شي بيت أبعد بيت. ممحي ورا حدود العتم والريح، والثلج نازل بالدني تجريح يضيع طريقك وما تعود تفل. وتضل حدي تضل. ويزهر ويدبل ألف موسم فل وتضل حدي. تضل حدي…. تضل. وما يضل بالقنديل نقطة زيت. هون السما قريبي بتسمعنا يا حبيبي.

بس….

كل مين طوي شراعو وراح بهالمدى ولدين وضاعوا ع جسر الصدى. تفارقنا بهدا والدنية هدا.

-” بخاطرَك صليلي”

- “تسعد يا حبيبي”

وصارت هالدني طرقات ما عليها حدا  وبيوت ساكنها الصدى. ما في حدا لا تنده. ما في حدا. عتم وطريق وطير طاير عالهدا. بابن مسكر والعشب غطا الدراج. شو قولكن صاروا صدى.

يا قلب آخرتا معك تعبتني . شو باك دخلك صرت هيك وشو بني.

بتذَكَّر مرة، كنا بشي سهرة، ووشوشتك كلمة.

“لا تهجرني لا تنساني”.

آلو…

صوتَك بعيد.

بيتي بصير وعد لما بحاكيك. يا ويل عيوني كيف بتندهلك. ومتل المجنونة بتسير تقلك. بيطلعلي قول شعر وما بعرف قول. يا ريت بيتك كان منو بعيد والباب تحت البيت مش حديد.  شو بخاف حتى الخط ما يلاقيك. لازم إحكيك تأقدر نام.

يا سنين الرح ترجعيلي إرجعيلي شي مرة ارجعيلي وانسيني ع بواب الطفولة تأركض بشمس الطرقات. ورديلي ضحكاتي اللي راحوا والبعدا بزوايا الساحات.

بعدك على بالي يا قمر الحلوين يا سهر بتشرين يا دهب الغالي يا حلو يا مغرور يا حبق ومنتور على سطحي العالي. مرق الصيف بمواعيدو والهوا لملم عناقيدو وما عرفنا خبر عنك يا قمر. بتطل الليالي وبتروح الليلي  وبعدك على بالي.

بحبك ما بعرف هن قالولي ومن يومها صار القمر أكبر ع تلالنا وصارت الزغلولي تاكل ع إيدي اللوز والسكر. بحبك ما بعرف حب لا تشدني بإيدي. عنهر بدنية هنا جديدة. علموني هني علموني على حبك فتحولي عيوني.

لا تجي اليوم ولا تجي بكرا

مش لنا الزينة و بيارق المدينة

غير إنت وأنا يا حبيبي ما لنا.

خوفي لتضيعني بالعيد وما تقشعني

تعا لما بينده الحنين.

موسم الناس المنسيين.

تعا بلا خيال.

انا خيالك.