نُص رسالة
(7 votes, average: 5.00 out of 5)
Loading ...
مع إني بكتبش… وكل ما آجي اكتب، كل اشي بدي أقوله بتبخر وبطلعش معي اشي بالآخر…
مع اني بعرف اعبّر عن حالي أحسن بالإنجليزي، وبالعربي كل اشي بطلع مخربش…
مع إنو راح يوخدلي أكتر من ساعة اطبع هالرسالة لإني بطيئة بطباعة العربي…
ومع إنو يمكن يطلع الإشي بايخ… ومش بالزبط زي ما بدي…
لإنو هاي مش كتابة إبداعية… بس اشي كتير مهم يوصل… حَكي… نُص رسالة…
فقررت اكتب، وخلص مش فارقة معي!
مش عارفة من وين أبلّش… ولا ايش أقول… ولا مرة كنت منيحة بالتعبير وبالوصف…
مش عارفة كيف بنفع أختصر اللي عندي أقوله بكلمتين تلاتة…
أو كيف أوصفها هيي بكلمات عم تعجز توصف هالانسانة…
خلص… بحكي اللي براسي… وبلا فلسفة زيادة…
بحب لهجتها… بس بدهاش تصدقني… أو يمكن مصدقة، بس عم تستنّاني أطلع من الإشي وأزهق…
بحب مزحها… وبحب اسمعها تضحك… وأشوف ابتسامتها الحلوة (وابتسم أنا كمان لحالي)…
وشفافها… شفافها… أخخخخ… (*ركزي دي!!! ركزي!!! ركزي!!!*)
بحب كيف أصابعي تعوّدوا يبعتولها… كيف كل ما اكتبلها رسالة، بِلاقوا اسمها بسرعة وبسهولة…
وياما كتبت رسايل لغيرها ووصلوها هيي بالغلط من تحت راس هالشغلة…
بتحبش أقلها “ما ألَزِّك”… ولا حدا يقولها أمورة ونغشة…
وبتحبش أقولها يا قمر… مع انها ضاوي متل القمر بهالليل اللي مش قابل يخلص من حوالَيي…
وبحبها… أو… لأ… كتير قلتلها… “بحبك” بتكفيش… “بعشقك”… لأنو فيها… فيها جنون، فيها قوة… فيها… اشي اللي ما عرفتش ولا مرة أشرحلها ياتو…
بس تركنا… لأنو في اشياء مش محلولة… ويمكن في مشاعر قديمة… ولإنو بدهاش علاقة… ولإنو الإشي معقد… ولإنوووو… بعرفش… خلص لإنو !
بس بعدين ما صدّقِت لما رجعنا نحكي… وتطورت الاشياء بسرعة وبعفوية…
بس عِرفَتْ شو عْمِلِت واحنا مش مع بعض… هالإشي اللي ولا مرة قْدِرِتْ أعمَله بدون ما قلبي يكون بالإشي مِيّي بالمِيّي…
ومع إنو بدهاش علاقة، تضايَقَتْ… معقول عشان مش قادرة تتخيّل وحدة تاني تدقرني… أو معقول فكرَت إنها خلص خسرتني…
وقرّرَتْ كمان دور تبعد.. وبدون ما تعرف… بكّتني…
آ بدي الإشي أبسط… بديش بعد أبكي، وبديش بعد أتوجّع…
بس بديش تبعد… فَ خلَص، مش فارقة معي التعقيدات والمشاكل والزعل الجاي لقدام…
اللي بدها ياتو بصير، ومنمشي مع هالتيار…
تعوّدِت ما أسألِش… أو… بحاول… وما أفتحش مواضيع معينة…
وماشي، بلاش أجوبة… و بخلي زَعَلي إلي ومشاعري جُوا مخبَّية…
ليش؟ لأنو مع كل هاد… بحبها… وهيي الإشي الوحيد المتأكدة منو، ومشاعري إلها هي الاشي الوحيد المنطقي بحياتي ومش اشي بدي استغني عنو…
بحبها… بس كل فترة و فترة برجع بفكر… و… بِوَجّع… لَإنو… لَإنو !
وبضايق… بضايق إنو… مع كل اللي كان بينّا، ومع كل اللي صار… ما لحقتش…
ما لحقتش أعزفلها ع الجيتارة زي ما بدي…
ما لحقتش ألعَبِلها بشعرها و هيي نايمي حدي…
ما لحقتش أخُدها ع البحر وألَبِّسها طاقيتي…
ما لحقتش أتفرج معها ع الشمس عم تغرب وراسها ع كتفي…
ما لحقتش أ…
ما لحقتش…
ما لحقتش…
Deeno Dee – Aswat
Leave a Reply