بحب كتير كتير
(13 votes, average: 5.00 out of 5)
Loading ...
كانت بالحفلة مبارح… كانت الحفلة كلها بنات…
كانت كلها صبايا حلوات.. كلها غناني لذيذه.. وهيي بتحب الغناني.. وهيي بتحب الصبايا كمان.. وأنا..
أنا كنت على شط البحر..
كنت اغني.. كنت أتمشى..
كنت أفكر فيها..
كنت اتحمم… كنت اكتب..
كنت أفكر فيها…
كنت بالتخت… كنت عم بجرب أنام.. وكنت أفكر فيها!
وهيي كانت بالحفلة.. كانت ترقص مع الصبايا.. قالتلي إنها انبسطت كتير، قالتلي إنها مفكرتش كتير.! وأنا…
أنا اشتقتلها.. اشتقتلها كتير كتير… وفكرت فيها اكتر من بكتير وعشان هيك فتت أنام بكير!!
عشان تعبت من التفكير..
قالتلي إنها رقصت على غناي مع شي صبيه وتذكرتني.. وأنا تمنيت لو إنها بدل الصبيه هديك تخيلتني…
بحب لمن بتقولي إنها بتشتاقلي.. بحب لمن الصبح بتفيق وسمس (sms) دغري بتبعتلي..!
بحب لمن بتضحكلي وبتقولي انو ضحكتي بتسحرها.. ضحكتي بتقتلها.. ضحكتي عل-أخر بتجننها!!!
بحب لمن بتقولي إني مش ع ذوقها!! وأنا بعرف إنها علي بتتطلع.. وقلبها فيي مولع..
ما هيي ع طول بتحكيني وبتتطلع فيني وبتقولي إني سبيشل (special) وأنا… أنا بدوب لأنها على قلبي متل العسل!!
بحب لمن بتقولي.. إننا منقدر نحكي عن أي شي.. عن كل شي وعن ولا شي..
بحب كيف منقعد نحكي ساعات ومنضحك كل الوقت.. ومنزهقش ولا لدقيقة من بعض..
منحكي كتير ومنضحك كتير.. والوقت بمرق زي كأنه عم بطير!!
وبحب.. بحب.. بحب بعد كتير أشياء.. كتير كتير ..
بحب لمن قولتيلي انو انا والبحر عالصبح.. هيي احلى طريقة تبلشي فيها نهارك!!
بحب انك بتشجعني وانك بتحويني.. بحب انك دايما بتفهميني..
بحب كيف آخر مره عبطتيني.. عبطتيني مش بس بإيديكي.. عبطتيني بقلبك، بروحك، بتفكيرك، بخيالك وبكل شي.. وأنا..
أنا قلتلك انو كل اشي منك بحرك كل اشي فيي.. متذكري..؟
يمكن راح تقولولي هاي علاقة عشاق.. يمكن عشان مش عمنقدر على الفراق.. بس أنا..
أنا ما بدي اعرّف علاقتنا.. ما بدي احلّلها.. ولا بدي اشخّصها.. بديش أعطيها “اسم” يحددها.. ولا أحطها بشي قالب يحجزها.
بدي اياها اتضلها غريبة.. بدي اياها اتضلها مش أكيدة.. ما بدي فكر لقدام.. ما بدي فكر شو راح يكون وشو كان.. بدي
إسا، بدي ها اللحظة تكون معها.. وبدي اقلها…
بحب “جوا” معك.. وبحب مين أنا معك.. وبحب كيف أنتي معي.. وبحب “إحنا”… كتير بحب إحنا..
وكتير.. كتير…
- بقلم “دي” من “أصوات”
Leave a Reply