أنا مش غريبة..أنا مثلية
(10 votes, average: 5.00 out of 5)
Loading ...
كل عمري حس حالي مختلفة عن الآخرين، غريبة عن أهلي ومجتمعي وأصدقائي. مش لأن بدي كون هيك، مش لأنو هيك أحلى، بس بعرف انو عشت فترة طويلة من حياتي مقتنعة انو لا هالزمان زماني، ولا هالمكان مكاني!
هيدا البطن مش ممكن يكون جابك..ولا كأنك بنتي..شو بعد رح تعملي ؟!
بعد رح تشوفو كتير مني !!
هيدا كان جوابي للوالدة، الام المثالية يللي ما فهمت ليش بنتها الكبيرة فتحت جدل بيزنطي مع معلمة الدين، والموضوع كان كيف معقول يكون شكلو ل الله، بينام بالليل، بياكل، شو عمل توصل لهالمكانة الرفيعة ؟!
ربيت بمجتمع العيب والحرام، مجتمع التابو والممنوع، مجتمع مسحوق من أوله لآخره، مجتمع لا يلتقي فيه الخطان المتوازيان الا اذا شاء الله. كان هيدا تعريف مادة الرياضيات لمفهوم التوازي، يعني حسب هيدي النظرية، شارع الحمراء وشارع “بليس” مش ممكن يلتقوا…الا بمشيئة الرب !!
كبرت وكبرت غرابتي معي، كنت جاوب ع طول “أنا هيك”. كنت أرفض كل الاشياء العادية او البديهية، وجوابي الحاضر كان دايما انو أنا هيك…وشوفو شو بدكن تعملو معي!
بس أول مرة اكتشفت فيها ميولي الجنسية المثلية، كانت أول مرة بقول فيها لحالي، لا أنا مش هيك…مش ممكن كون هيك…هيدا الشي مش طبيعي، مش ممكن كون غريبة لهالدرجة !
وبلشت حربي الباردة مع مثليتي الجنسية.
المعارك تنوعت ما بين الرفض الى النكران الى اللامبالاة وكل ما توفر من أسلحة وعتاد !
حطيت الحق على امي يلي دايما خوفتني من الرجال.
حطيت الحق على أبوي يللي دايما كان يقول انو ما جاب ولاد بس بنتي الكبيرة “أخت رجال”.
حطيت الحق على المجتمع يللي حرم علي الاختلاط واعتبرت انو مشاعري توجهت للمطرح الغلط !
حطيت الحق على البنت يللي كانت ترسملي لوحات وتخبيهن بطاولتي، وتسرق لمسة من ايدي من وقت للتاني!
حطيت الحق على كل الرجال يللي سمحتلن يمرقو بحياتي..وما عرفت معهن اي فكرة عن الحب !
اللحظة يللي اعترفت فيها لذاتي بمثليتي الجنسية، اللحظة يلي استسلمت فيها لكل هالمشاعر الحلوة، اللحظة يللي فتحت فيها كل الجوارير العتيقة المنسية بذاكرتي، كانت هي اللحظة يللي ودعت فيها غرابتي، راحت بلا رجعة، ودعت فيها كل مشاعر الغضب واللوم يلي وجهتها للآخرين.
أمي.. الرجال ما بخوفو..الرجال كتير مهضومين..بس ما بحبهن !
أبوي.. بنتك أخت رجال، بحسب مفهوم وتعبيرهالمجتمع…لهيك وصلت بحياتها..بس الرجال ما بيعجبوها !
أيها المجتمع المسحوق..ما رح تسحقني..يمكن اقدر غيرك..بس عالأكيد ما رح تغيرني !
صاحبتي من المدرسة.. كان ممكن تكوني أول حب بحياتي.. وعلى فكرة لوحاتك بعدهن معي !
لكل الرجال يللي عرفتهن..بعتذر منكن..ما بعرف حبكن..بس معكن عرفت كيف لازم حب بطريقة تناسبني وتسعدني !
أنا مش غريبة..أنا مثلية..هيدا المكان هو مكاني..الزمان ضاع منو شوي..بس يللي جايي أكيد أحلى !
- بقلم “R.R”
Leave a Reply