سيرلنكيتها الفيليبينية

802 views

في ما يلي دليل للمدامات عن كيفية معاملة “خادمتها السيرلنكية” (يتضمن كل الجنسيات: الاثيوبية والفيليبينية والسورية وغيرها…ولكن كي تستوعب المدامات، ارتأينا استخدام “السيرلنكية”):

1- “قعديها وراكي، شو بدك تقعديها حدك!” (حوار بين مدام “كلاس” ومدام “بورجواز” عن وين بدها تقعد “سيرلنكيتها”). وفي أصول لتقعديها وراكي، وراكي يعني وراكي عالشمال، مش ع اليمين، أحسن ما الناس تقول: “يا عيبو عاملة شوفير لسيريلنكيتها!”

2- غيري اسمها لأن دايما دايما اسمها صعب. يعني هي غصب عن رقبتها بدا تحفظ اسمك واسم ولادك وزوجك وجيرانك والناطور والشوفير والدكنجي وصاحباتك (بلا معنى) وباقي المدامات اللي بيجو كل يوم الصبح بيطقوا حنك عالصبحية والعصرونية والسهرة من عشية….بس انت صعب كتير تحفظي اسمها.

3-أوعى تعطيها ريق حلو! أوعى! بتركب ع ضهرك وبتسرقك وبتسمم ولادك وبتهرب مع صاحبها.

4- لديك الصلاحية المطلقة انك تضربيها وتسلخيها وتحرقيها وتمنعي عنها المصروف وتحبسيها بغرفتها وكل شي بيطلع ع بالك، لأي سبب كان، اذا نسيت تنظف الغبرة، أو اذا شكيتي انو “الميسيو” عم يحبها عليكي، أو اذا ما فاقت بنص الليل وأعطت “البيبرون” لابنك، أو حتى اذا تخانقت مع “المستر” وبدك تفشي خلقك بحدا.

5- أوعى تشتري الها تياب من مطرح ما بتشتري لالك! ولو! يعني معقول “سيرلنكيتك” تلبس تياب مرتبين؟؟ أو باقي المدامات يقولو انو “يييي بتشتري لسيرلنكيتها تياب من محل مرتب مش من محل ال 500!”؟ حلوة بحقك؟؟ بعدين، اذا بتريحي راسك وبتلبسيها costume “السيرلنكيات” تا ينتبهوا كل الناس اللي بالشارع انو عندك “سيرلنكية” بيكون أحسن… هلق انا بعرف انو قلبك كتير طيب شيري، بس معليه، خدي ابرة بنج لضميرك، كرمال البرستيج، مشينا.

6- أوعى تقعديها معكن ع الطاولة وقت الغدا أو العشا، بتقعد وحدها بالمطبخ بتاكل وحدها عالطاولة بالزاوية…بعرف شيري انو قلبك عم يوجعك عليها، بس معليه، كمان مشينا كرمال البرستيج.

7- أوعى تقعديها معكم بالصالون ع الكنباية، بتقعد عالأرض…بلكي علقان بتيابها شي. بلكي وقع من راسها شي، بلكي الجارة (كمان مدام) هي وعم تراقب من البلكون انتبهت انو انتي داعسة ع برستيجك ومقعدة سيرلنكيتك ع الكنباية؟؟؟ ييي يا مصيبتي، يا وقعة السودا… يا فضيحتنا بالحي والأحياء المجاورة والشقيقة.

8- هلق انتبهي منيح ل شو بدي قلك. نهار الأحد، يللي هو يوم عطلتها الوحيد بعد ما تكوني فلحتي عليها كل الأسبوع، حاولي قد ما فيكي ما تعطيها ياه عطلة. (سوف نتبع هذا الدليل بدليل آخر عن الحجج اللي ممكن تستخدميها ت ما تعطيها عطلة نهار الأحد.) واذا انحرجت واضطريت تعطيها العطلة، بحيلها قلبها وطلعيلها روحها قبل، والساعة 7 بتكون بالبيت، 7 ودقيقة “منرجعك ع سيرلنكا وموتي من الجوع”.

9- بهاراتها وأكلاتها ما بينحطو بالبراد أو بخزانة المونة، ريحتهن يا مدام ما بتنحمل! انو معقول نشم ريحة بهار سيرلنكي؟! أو توم فيليبيني؟ معقول؟؟ بس هيي تشم ريحة الغمة والكروش والكوارع والنخاعات واللسانات معليه. نحنا أكلنا “كلاس”، يصحلها!

10- بس تمشي بالشارع أو انتو وعم تعملي shopping، مشيها وراكي، لا حدك ولا قدامك…ما تكون مفكرة حالها هي ست البيت؟؟!

11- اذا كان عندك شي عزيمة كبيرة وكتير “بورجواز” وهيك، و”سيرلنكيتك” ما رح تقدر تقوم بواجباتها تجاه المدامات وحضرات الأساتذة المعازيم، فيكي “تستعيري” “فيليبينية” مدام روزالي، وفرد مرة استعيري جاطات ال “سينييه” تا تضيفي فيهن.

ملاحظة: في لبنان، تنتحر خادمة بمعدل كل أسبوع، عدا عن حالات الوفيات الناتجة عن التعذيب أو الضرب، وفقا لتقرير أعدته منظمة “هيومن رايتس ووتش”. وبات لبنان يعرف ب “بلد الرقيق” نتيجة الظروف المأساوية التي تعيشها خادمات المنازل، والطرق اللاإنسانية التي يتم بها استقدامهن الى لبنان من بلدانهن الأصلية. وللمناسبة، تم تنظيم لقاء حواري في “زيكو هاوس” يوم الأحد الموافق في ٦ كانون الأول ٢٠٠٩، تكريما لأرواح هؤلاء العاملات، وتخلله نقاش حول أوضاعهن المزرية.

Tags: body, domestic worker, human rights, lebanon