ما حكوا منطق

1,306 views

جينا هيك بكل قلب كبير، حكيناهن وقلنالن يا خيّ تعوا نحكي منطق…
انه ليش عم تحكوا هيك وهيك… ومفوتين حالكن، بس مش مفوتيننا نحن، بالحيط…
ساعة هيك وساعة هيك… بس حسب قدام مين… وكيف…
وفي منن… يعني بقولولك لاء وما بصير، بس من جوّا ايه وايه وايه.. بس ما بيسترجوا يقولوا ايه قدام “الكون” لانن… خايفين…
ما اختلفنا العملية بدها جرأة بالموقف، بس هني عندن الجرأة بس بالحكي والانتقاد وفكرن عم بصلحوا الامور، وانا فكري يعني، لو بصلحوا حالن اول شي… بعدين منحكي… ومنحكي منطق اذا شي…
ساعة انسانية ناقصة، ساعة تحاليل وساعة بكبّوا الشغلة ع الله… انه يا الله… يا كبير…
مين انت لتحدد انسانيتي وتمنحني ياها وتحكم عليها اذا كاملة او لاء… لمعلوماتك، في انسان… وبس ما في شي اسمه انسانية ناقصة… هاي مش موجودة ولا بقاموس ولا بقانون… انا عندي قاموس كتير مهم، فتشت منيح وما لقيت هالوصف اللي انت عم تحكي عليه… شكلك عندك قاموس خاص فيك… نسخة منقّحة بدها تكون…
شو تحديدك للانسانية وقيمة الانسان؟ كيف بكون الانسان كامل برأيك؟ اذا كانت متلك؟؟ اذا كان مثلك؟؟؟ مثلك انت؟ ايه كملت!!!
مين انت لتشخصلي مرض مش موجود فيني انا؟ وتحاول تعطيني نصايح وحلول؟

يا عيني ويا تسلملي…
اكتر الناس اللي انت عم تشوفن ناقصين… واللي مصنفين بمحل مش كتير اله قيمة عندك، اكثرن… المثليين يعني، اكثرن ناس مبدعين، مبدعين ايه… هيدي اذا انت كنت مش منتبهلها… مبدعين وفنانين، وكتّاب وشعرا وناشطين اجتماعيين… ناس عم يتركوا اثر بحياة كتير من الناس غيرن…
عم يتركوا اثر اهم بكتير من الاثر اللي انت حاولت تتركه بكلماته واحكامك علينا…
ناس عم يشتغلوا، ما عم بضيعوا وقت بالحكي واطلاق الاحكام وتصليح ميول الناس الجنسية، لانه مش هيدا اللي بهمن…
اصلاً مش هيدا المهم… هاي على فكرة يعني…
بتعرف شو يعني انك تدافع عن حق الانسان؟
بتعرف شو يعني انك تشتغل لترفع ظلم عن انسان ما اله ذنب وتطالب بحقوقه اللي المجتمع او العقليات المهريّة عم تسلبه ياها؟
بتعرف شو يعني انك تسعى لوطن حرّ؟ والاوطان الحرة ما فيها تكون حرّة اذا فيها ناس مظلومين، ناس مستعبدين من قبل مجتمعن او حتى من قبل افكارهن نفسها…
بتعرف شو يعني تكون انسان؟ بإنك تشوف انسانية الانسان بكل انسان لو شو ما كان؟ قد ما كان مختلف او متشابه معك؟
بتعرف شو يعني انك تتطلع لفوق؟ مش لتحت؟ وتقييّم الانسان بعقله وافكاره وانتاجيته بالمجتمع، وتمسكه بقيمه؟ اكتر ما تفكر بمين نايم بتخته؟؟؟
بتعرف شو يعني انك تحترم كل مخلوقات الله، وتشهد بكمال هالمخلوقات… انه فكرك الله عم يخلق مخلوقات ناقصة؟ غلطة بالتصنيع يعني؟ وخلونها نتلف هالمنتج؟ لاء يا عيني… كل مخلوقات الله كاملة وغالية ومهمة، حتى لو كانت مش كلها بتشبه بعضها، غلاوة ابنك اللى عنده عيون زرق وحلوين كتير هي بنفس غلاوة ابنك اللي عيونه بنيين وكتير عاديين، وكمان بغلاوة ابنك اللي ما بشوف اصلاً بس عنده نور بقلبه اكتر من كل شي في عيون بعيونك…
ما بعرف اذا بتعرف او فكرت بكل هالاشيا…
مش مهم ع كل حال…
برغم كل افكارك الغريبة والعجيبة… اذا لقينا شي يوم انك مهدد كانسان ورح تتعرض للظلم، رح نكون واقفين معك وعم ندافع عن حقوقك لانه منشوف فيك انسان قبل كل شي… واذا بدنا نقول عن شي ناقص فيك، يمكن نقول عن معلوماتك، عن عقلاتك، عن تحليلات، بس ابداً مش رح نشوف انسانيتك ناقصة…

ما حدا

Tags: argumentation, thoughts