منطق ع الماشي
(3 votes, average: 5.00 out of 5)
Loading ...
ما شفتكن ولا مرة اعترضتوا على ناس حاملين سلاح وعم بقتلوا وينكلوا ببعض… بالعكس كان بدكن تشاركوا وتكونوا طرف وتاخدوا جهة معينة…
بس بتقيموا الدني وبتقعدوها اذا شفتوا شي شبين ماسكين ايدين بعض… بحب!! انه يا لطيف وشو هالكارثة… وما بصير وما بيسوا ولازم نحط حد لهالامور…
انه بتفضلوا القتل والحرب على الحب… اذا كان هالحب ما بيتطابق مع “مفاهيمكم” العظيمة…
لا والله بفضل شوف شبين او بنتين قاعدين ع كرسي بحديقة عامة ماسكين ايدين بعض على انه شوف اثنين رافعين سلاح ع بعض وعم بدمرولي مستقبل بلدي…وبفضل مية مرة انصاب بشظية حب على اني انصاب بشظية حرب… حكوا منطق!!!
انه بضحكوني هيدول اللي بيعتبروا حالن منفتحين وبيتقبلوا غيرن بكل رحابة صدر وفكر…
انه انا ما عندي مشكلة مع المثليين… عندي كتير اصحاب مثليين… وما بتهمني حياتن الخاصة ولا شو بمارسوا…
بس… وقت اللي بيكتشف او بشك انه في حدا مثلي بمحيطه او حتى من اصدقائه… بصير عنده حالة قرف وغثيان وبشكل واضح وفاضح… بس هو ما عنده مشكلة!!!!
ليش؟؟ شو صاير عليك، وليش عم تعمل بحالك هيك ؟
انه ما حدا مانعك تقول انه انت ضد هالفكرة وما بتتقبلها… شو فيها يعني، ما انت كمان عندك رأيك وفينا نحترمه… بس انه تقول شي وتتصرف شي، هيدا شي… شي مش ممكن نحترمه فيك ولا نحترمك انت كمان… انه لشو هالانفصام والازدواجية… شو ناقصنا نسخ مشوهة يعني؟ و ٨٠ و ٨٠ يا حكيم؟؟؟
قريت من فترة مقال بقول انه لبنان هو الوجهة الامثل والاكثر اماناً للمثليين من أرجاء العالم، وبالمقال كان في حديث مع شبّ عراقي، كان عم بعبر عن فرحه انه موجود بلبنان هالبلد اللي فيو مطرح لكل انسان شو ما كان…
والله العظيم كبر قلبي، بس بنفس الوقت كبر همّي، انه شو بروح بفتش على هيدا الشب وبخبره الحقيقة، انه تعى يا حبيبي، تعى لقلك… انت عارف بالبند ٥٣٤؟؟؟ انه هيدا اللبنان اللي هو الوجهة الامثل واللي انت ونحن كمان ما مننكر انه مبسوطين كتير فيه… انه فيهن يحبسوك بحكم القانون؟؟؟ وفيك تمضي سنة بسجونه مش بس بربوعه الخضرا؟؟؟ ايه حكوا منطق…
بضحكوني كمان هيدول المتدينين واللي هني ضد المثلية بدافع الدين انه هيدا الشي حرام والدين ما بيسمح فيه… وبمارسوا العنف ضد المثليين بكل اشكاله… بس هالمتدينين، هل تذكروا شي مرة، او مرقت علين هالجملة او قريوها بشي محل؟ الجملة اللي بتقول: اكره الخطيئة واحب الخاطىء؟؟؟؟
انه كيف هيدي؟ حتى هون صار في ازدواجية، مناخد اللي بدنا واللي بيعجبنا ومنطبقه والشي اللي مش على ذوقنا منتجاهله؟؟؟
فيك تكون ضد فكرة المثلية… بس ما تكون ضد الانسان المثلي وتحاربه… او بالقليلة حاربه لانك انت مش مع الفكرة بس ما تتغطى بانه الدين بقلك هيك… حكوا منطق…
واحد قاعد عالقهوة عم يلعب طاولة كل النهار وارجيلة رايحة وارجيلة جاية وتركيب مقلة وطق حنك وعم ياخد مصروفه من امه اللي بعدها لهلق بتشتغل ع مكنة الخياطة وما بقى قاشعة بعيونها لتصرف عليه وتعطيه مصروفه… بيسمع بانه بنت جيرانن تخرجت من الجامعة بامتياز واجتها منحة لتسافر تكفي علمها برّا وقديش امها وبيها فخورين فيها ومبسوطين… ببلش يهز براسه وتسك تسك تسك يا حرام… بيسألوه شلة الاصحاب من الفاشلين اللي مجمعن حواليه وعامل زعيم علين، ليش؟ شو في؟ بقلن: قال مبسوطين فيها يا حرام… الله يستر علينا… يا حرام مبلية هالبنت… الله يساعد اهلها ويصبرن…!!! ليش؟ يه ليش ما بتعرفوا انها مثلية؟؟؟؟
هلق هي مبلية والله يصبّر اهلها لانه مثلية…. وانت شو يا ابني؟؟؟ الله يرفع راس اهلك فيك يعني؟؟؟ ويخليك فخر للامة العربية؟؟؟؟ ايه حكوا منطق…
قاعد عم تندب حظّك وتشد بشعرك وصرت متحمم بدموعك شي ثلاث مرّات: تركتني كرمال مرا!!! وع بكي وشلي ودموع… ولك فيق… تركتك لانك ما بتنطاق، مش مهم كرمال مرا ولا كرمال شجرة… تركتك لانه ما لقت فيك اللي بدها ياه… ولقته بغير محل، لقته عندها هي… وشو فيها يعني، بالنتيجة تركتك، اذا بدك تحزن احزن لانك خسرتها ولانها تركتك مش لانه تركتك كرمال مرا… كرمال الله يعني… احكي منطق… انه المصيبة اكبر اذا اللي تركتك كرمالها مرا… شو يعني؟؟؟ ما بالنتيجة تركتك… يمكن بعمرها ما ترجع… واذا رح تضلك هيك… الله لا يردك وعمرك ما ترجع انت كمان… وبس بدك تحكي… احكي منطق…
بيكبر قلبي لما بسمع بناس عم يدعوا ب لا للطائفية ولا للعنصرية ونعم لتقبل الاخر والى ما هنالك من دعوات للتعالي على اختلافاتنا بالمجتمع اللبناني لنوصل لمطرح الكل بيتقبل فيه الثاني ابعد من الاشيا اللي بيختلفوا عليها… وكمان الدعوات اللي ضد العنصرية… كلها شي ببشر بشوية امل ببكرا… بس بنفس الوقت بشوف انه هيدول اللي عم يحكوا هالحكي ومآمنين فيه لاقصى حدود، هني ضد فئة معينة من هالمجتمع اللبناني، وعم بحاربوها ومش قادرين يتقبلوها وييعتبروا انه هالفئة كمان هي جزء من مجتمعنا ولازم نقبلها ونعترف بحقوقها… لاء هني هدفن الغاء هالفئة او بالقليلة الغاء حقوقها وعزلها ومحاولة العمل على ازالتها من المجتمع… وبشوفوا فيها خطر ضد الوطن… يعني اكبر من خطر اعدائنا التاريخيين علينا… اللي ممكن ما يكون عندن موقف هلقد صلب ضدن…! مثلاً
هني ضد المثلية… طيب يا خيّ، اذا انت بدك تقبل شخص مختلف عنك بإيمانه، بمعتقداته… وبدك تقول انه هالشخص مثله مثلك ولازم يكون عنده كل حقوقك لانه لبناني مثلك… طيب هالانسان المثلي، شو وضعه بقاموس حقوق الانسان الخاص فيك؟ ما فيك تفضيله شي صفحة بقاموسك او تعمله مساحة بعقلك الرحب اللي قادر يتقبل كل شي؟؟؟ ليش يعني؟ بدك تقبل حدا مختلف عنك بكل شي بس بيجمعك فيه هويته اللبنانية… ليش ما بدك تقبل المثلي، اللي هو مثله مثلك كمان… لبناني… ويمكن تلاقي اشيا كتير متشابهة بينك بينه، بمبادئه باحلامه بوطنه، بنظرته لكتير اشيا، انه شو الفرق؟؟؟
بس بدكن تدعوا للحقوق، لازم تدعوا لحقوق الكل مش نص نص… بس بدكن تحكوا ابقوا حكوا منطق… يعني بكون احسن… منطقيا يعني…
Leave a Reply