“ضد الدين”

485 views

احكيني منطق وما بقى تكذب عليي و ع حالك. أنا وياك منعرف انو القصة ما خصها بالدين. ما بحياتي شفتك رايح ع كنيسة أو حامل القرآن أو عم بتصلي. كيف ت فجأة صرت متدين؟ كيف ت فجأة صرت تعرف شو يللي ضد الدين، وشو يللي الله بيرضى فيه؟

بتتمسك بالدين، لأنو مفكر انو بحمي أفكارك المتحجرة، بيعطيها قوة، و بيبطل فيني شارعك، بس الدين مش هدفو يأمنلك تغطية للغلط يللي بترتكبو بحق أختك وخيك بالانسانية.

لما تحكي عن العالم وتنزع صيطهن، هيدا ضد الأخوة يللجوهر الدين.

لما تكره شخص ما بتعرف شي عنو غير تفصيل زغير متل ميولو الجنسية، هيدا ضد جوهر المحبة اللي هيي جوهر الدين.

لما ترفض التنوع والاختلاف يللي الله خلقهن بالناس يللي حولك، وما تتقبل وجودهن، هيدا ضد التسامح يللي هو جوهر الدين.

لما تحكم ع غيرك و ما تشوف أغلاطك، هيدا ضد العدل يللي هوي جوهر الدين.

لما تعيش حياتك عم تاخذ وما عم تعطي شي من حالك، هيدا ضد العطاء يللي هو جوهر الدين.

ما تقلي شو يللي ضد الدين ، أنا بقلك، النفاق أول شي ضد الدين. ما بقى تدعي انك متدين. ما تتحجج بقى بالدين لأنو المنطق بيقول انو انت متمسك بعادات وتقاليد خرفانة ومتخلفة وذكورية، وما خصها بالدين. احكيني منطق واعترف انك مش قادر تتخلص من الأفكار المغلوطة والمريضة يللي ربيت عليها، اعترف انك مش قادر تتقبلني مش لأني ضد الدين، بس لأني بهدد الصورة يللي انت راسمها للمجتمع وبدك ياه يضل ع هالصورة. ما تقلي ضد الدين، لأنو مشكلتك معي مش بالدين، مشكلتك معي بتفكيرك وعاداتك يللي مش قابلة تتغير تا تخلي حياتي وحياتك أسهل وأحلى.

Tags: argumentation, religion