بخصوص هالخصوص

2,196 views

بخصوص هيدا الموضوع اللي بدي احكيك فيه…

ايه انه بتعرف، شي هو المفروض يكون كتير مهم بس يعني مش كتير مهم الك انت… يمكن بس المهم بالموضوع انك تعرفه…
ايه ايه.. بتعرف يعني شي عني، عن ميولي، بس انه هي مش بس ميولي… هي اشيا شخصية وكتير خصها بالشخصية… انه من الناحية العاطفية اكتر شي…
يعني، انا بحب شي وانت بتحب شي، بس هالشي منه كل شي…
لا تجردني ولا تشردني ولا تنبذني ولا تعذبني…
وما تحرمني من كل شي بسبب هالشي… هيدا اهم شي…

لاء يا خيّ، لاء يا عيني، ما دخل لا الطفولة ولا الرجولة ولا الانوثة ولا شي منه…
القصة اكبر واعمق من هيك…
القصة، يعني ما بدك كتير تقعد تحلل وتفكر فيها…
هي هيك، شي عاطفي انساني… ايه ولو كانت الامور عم تخليك تشوفني كانسان ثاني…
مش مشكلة، بضل المنحى الانساني… ولا انساك ولا تنساني… خلينا عم نحكي من انسان لانسانة وما تروح وتفكر بشي ثاني…
لاء ما دخل لا الاهل ولا العنف… لا في عذاب ولا دراما بالموضوع…
ما دخل لا خلل، ولا مرض ولا حتى فشل…
ما دخل، ما دخل…  بلا هبل…

يعني بخصوص هالموضوع بالخصوص…
شغلة عاطفية اكتر منها شغلة يعني جنسية وهوس ومرض وجنون، وعلاجات نفسية وتعاويذ دينية…
شغلة وجودية، مش ضروري تكون مصيرية…

الشغلة انسانية…
هيدا كل شي بهالخصوص…
افهموها بقى

Contributed by Ma 7ada

Tags: thoughts